एजेन्सी – पूर्व कप्तान जो रुट र जोनी बेयरस्टोको सानदार शतकमा इंग्ल्यान्डले पाँचौं टेस्ट खेलमा भारतमाथि ७ विकेटको ऐतिहासिक जित हात पारेको छ । आफ्नो टेस्ट इतिहास कै सर्वाधिक ठूलो लक्ष्य पूरा गर्दै पाँच खेलको सिरिज इंग्ल्यान्डले २–२ को बराबरीमा सकाएको छ ।

जितको लागि ३ सय ७८ रनको विजयी लक्ष्य पछ्याएको इंग्ल्यान्डले पाँचौं दिन पहिलो सेसनमा ७६.४ ओभरमा ३ विकेट गुमाउँदै पूरा गयो । यो इंग्ल्यान्डले टेस्ट क्रिकेटमा पूरा गरेको सर्वाधिक ठूलो योगफल हो । यसअघि इंग्ल्यान्डले २०१९ मा लिड्समा अष्ट्रेलियाविरुद्ध ३ सय ५९ रनको लक्ष्य पूरा गरेको थियो ।

इंग्ल्यान्डका जो रुट १ सय ७३ बलमा १९ चौका र १ छक्का १ सय ४२ रनमा अविजित रहे । रुटको यो टेस्ट करिअरको २८ औंं शतक हो । २०२१ यता रुटको टेस्टमा ११ औं शतक हो । जोनी बेयरस्टो १ सय ४५ बलमा १५ चौका र १ छक्कासहित १ सय १४ रनमा अविजित रहे । बेयरस्टोको यो टेस्ट करिअरको १२ औं शतक हो ।

बेयरस्टोले दुबै इनिङमा शतक प्रहार गरेका हुन् । पहिलो इनिङमा बेयरस्टोले १ सय ६ रनको शतकीय इनिङ खेलेका थिए । चौथो विकेटका लागि रुट र बेयरस्टोले ३ सय १६ बलमा २ सय ६९ रनको अविजित साझेदारी गर्दै ऐतिहासिक जित पक्का गरे । इंग्ल्यान्डलाई ओपनर ज्याक क्रली र एलेक्स लिसले २१.४ ओभरमा १ सय ७ रनको शतकीय साझेदारी गर्दै उत्कृष्ट सुरुवात दिलाए ।

जस्प्रित बुमराहले क्रलीलाई ४६ रनमा बोल्ड गर्दै साझेदारी तोडे । युवा ब्याटर क्रलीले ७६ बलमा ७ चौका प्रहार गरे । ओली पोप बुमराहको बलमा विकेटकिपर ऋषभ पन्तबाट शून्यमा आउट भए ।

लिस ६५ बलमा ८ चौकासहित ५६ रनमा रन आउट भएका थिए । दुई रन जोड्न तीन विकेट गुमाएपछि इंग्ल्यान्ड राम्रो सुरुवातका बाबजुद १०९–३ को अवस्थामा पुगेको थियो । तर त्यसपछि भारतीय बलर रुट र बेयरस्टो सामू निरही बने । भारतका जस्प्रित बुमराहले दुई विकेट लिए ।

त्यसअघि चौथो दिन दोस्रो सेसनमा भारत २ सय ४५ रनमा अल आउट भयो । पहिलो इनिङमा १ सय ३२ रनले अग्रता लिएको हुँदा समग्रमा ३ सय ७८ रनको लक्ष्य दिएको हो । भारतका विकेटकिपर ऋषभ पन्तले ८६ बलमा ८ चौका सहित ५७ रनको योगदान दिए ।

चेतेश्वर पुजाराले १ सय ६८ बलमा ८ चौकासहित सर्वाधिक ६६ रनको योगदान दिए । यी दुई बाहेक अन्य ब्याटर नचल्दा भारतले विशाल रनको योगफल बनाउने अवसर गुमाएको थियो । ओपनर शुभमन गिल ४, हनुमा विहारी ११ र विराट कोहली २० रनमा आउट भए ।

श्रेयस ऐर १९, रविन्द्र जडेजा २३, शार्दुल ठाकुर ४ र मोहम्मद शामीले १३ रन बनाए । इंग्ल्यान्डका कप्तान बेन स्टोक्सले सर्वाधिक चार विकेट लिए । स्टुअर्ट ब्रोड र म्याथ्यु पट्सले २-२ विकेट लिए । जेम्स एन्डरसन र ज्याक लीचले १-१ विकेट लिए ।

त्यसअघि इंग्ल्यान्ड पहिलो इनिङमा २ सय ८४ रनमा अल आउट भयो । इंग्ल्यान्डका जोनी बेयरस्टोले १ सय ४० बलमा १४ चौका र २ छक्कासहित १ सय ६ रनको शतकीय इनिङ खेले । बेयरस्टोको यो टेस्ट करिअरको ११ औं शतक हो ।

जो रुट ६७ बलमा ४ चौकासहित ३१ र साम बलिङ्ग्स ५७ बलमा ४ चौकासहित ३६ रनमा आउट भए । म्याथ्यु पट्स १९, बेन स्टोक्स २५, ओली पोप १० र ज्याक क्रली ९ रनमा आउट भए । भारतका मोहम्मद शिराजले सर्वाधिक चार र जस्प्रित बुमराहले तीन विकेट लिए । मोहम्मद शामीको नाममा दुई विकेट रह्यो ।

त्यसअघि बर्मिङ्घममा टस हारेर पहिला ब्याटिङको निम्तो पाएको भारत पहिलो इनिङमा ४ सय १६ रनमा अल आउट भयो । भारतका विकेटकिपर ऋषभ पन्तले १ सय ११ बलमा २० चौका र ४ छक्कासहित १ सय ४६ रनको सानदार शतकीय इनिङ खेले । पन्तको यो टेस्ट करिअरको पाँचौं शतक हो ।

एक समय ९८–५ को खराब सुरुवात गरेको भारतलाई छैटौं विकेटका लागि रविन्द्र जडेजा र ऋषभ पन्तले २ सय २२ रनको दोहोरो शतकीय साझेदारी गर्दै बलियो अवस्थामा पुर्याएका थिए । जडेजा १ सय ९४ बलमा १३ चौकासहित १ सय ४ रनमा आउट भए ।

तीव्र गतिका बलर जिमी एन्डरसनले ओपनर सुभमन गिललाई १७ र चेतेश्वर पुजारालाई १३ रनमा ज्याक क्रलीबाट क्याच गराए । हनुमा विहारीलाई युवा तीव्र गतिका बलर म्याथ्यु पट्सले २० रनमा एलबीडब्लू आउट गरे । भारतका प्रमुख ब्याटर विराट कोहली पट्सको बलमा ११ रनमा बोल्ड भएपछि इंग्ल्यान्डले उत्कृष्ट सुरुवात गरेको थियो ।

बुमराह १६ बलमा ४ चौका र २ छक्कासहित ३१ रनमा अविजित रहे । स्टुअर्ट बोर्डको ओभरमा चार लेगवाई सहित बुमराहले एकै ओभरमा ३५ रन जोडेका थिए । जुन टेस्ट क्रिकेटमा एकै ओभरमा बनेको सर्वाधिक धेरै रन हो । इंग्ल्यान्डका जेम्स एन्डरसनले सर्वाधिक पाँच विकेट लिए ।

यस सिरिज गतवर्ष सेप्टेम्बरमा कोरोना कारण स्थगित भएको थियो । पहिलो खेल बराबरी हुँदा दोस्रो खेल भारतले १ सय ५१ रनले जितेको थियो । तेस्रो खेलमा इंग्ल्यान्ड इनिङ अन्तरले ७६ रनले विजयी हुँदा चौथो खेलमा १ सय ५७ रनले पराजित भएको थियो ।

भारत र इंग्ल्यान्डबीच अव तीन ओडिआई र तीन टि२० आई खेलको सिरिज हुनेछ । पहिलो टि२० आई खेल बिहीबार हुनेछ । भारतको रोहित शर्मा र इंग्ल्यान्डको जस बटलरले कप्तानी गर्ने छन् । ओईन मोर्गनले सन्न्यास लिएपछि कप्तान बनेका बटलरको प्रदर्शन र कप्तानी निकै महत्वपूर्ण हुनेछ ।