काठमाडौं (हाम्रो खेलकुद) – बलियो मधेश प्रदेशले बलियो नेपाल कप यू–१५ क्रिकेट प्रतियोगिताको उपाधि जितेको छ । आइतबार सम्पन्न फाइनलमा बलियो बागमती प्रदेशलाई ४ विकेटले पराजित गर्दै बलियो मधेशले उपाधि हात पारेको हो ।

मुलपानी क्रिकेट मैदानमा ९६ रनको लक्ष्य मधेशले १५ ओभर ३ बलमा ६ विकेट गुमाएर पुरा ग¥यो । मधेशको जितमा खेलको प्लेयर अफ दि म्याच रञ्जन यादवले ३४ रनको इनिङ्स खेले । बागमतीका कप्तान युवराज खत्रीले १६ रन खर्चिएर ३ विकेट लिएपनि टोलीलाई जित दिलाउन भने सकेनन ।

त्यसअघि टस हारेर ब्याटिङको निम्तो पाएको बागमतीले निर्धारित २० ओभरमा ९ विकेट गुमाएर ९५ रन जोड्न सक्यो । आकाश टमाटाले २३ रन जोड्न बाहेक अन्य ब्याटरले उल्लेख्य प्रदर्शन गर्न सकेनन् । मधेसका साईमन रोएले ४ ओभरमा १० रन खर्चिएर २ विकेट हात पारे ।

मधेश प्रदेशका साईमन रोए प्रतियोगिताको प्लेयर अफ दि टुर्नामेन्ट घोषित भए । बलियो ११ का जेनिश मगर, कमल शाही र बागमती प्रदेशका युवराज खत्री प्रतियोगिताको इमार्जिङ खेलाडी घोषित भए ।

विजयी टोली तथा खेलाडीलाई सभासद अमन लाल मोदी, राष्ट्रिय टोलीका पुर्व कप्तान पारस खड्का, ज्ञानेन्द्र मल्ल र बलियो नेपाल न्युट्रिसन इनिसिएटिभका प्रमुख कार्यकारी ड़ा. अतुल उपाध्यायलगायतले पुरस्कृत गरे ।