ह्युस्टन, (हाम्रो खेलकुद) – घरेलु टोली अमेरिकाले आइसिसी विश्वकप लिग-२ त्रिकोणात्मक ओडिआई सिरिजमा नेपाललाई २ सय ४६ रनको प्रतिस्पर्धात्मक लक्ष्य दिएको छ ।

मुसा क्रिकेट स्टेडियममा टस हारेर ब्याटिङको निम्तो पाएको अमेरिकाले निर्धारित ५० ओभरमा ७ विकेट गुमाउँदै २ सय ४५ रन बनायो । अमेरिका गजानन्द सिंहले ६० बलमा ५ चौका र १ छक्कासहित सर्वाधिक ५८ रन बनाए । सुशान्त मोदानीले ८३ बलमा ७ चौकासहित ५४ रनको योगदान दिए ।

तीव्र गतिका बलर करण केसीको पहिलो ओभरको पाँचौं बलमा बायाँ हाते ओपनर स्टिभन टेलर एज लागेर स्लिपमा वैकल्पिक फिल्डर सुनिल धमलाबाट एक रनमा क्याच आउट भए । यसअघि टेलरले पहिलो खेलमा नेपालविरुद्ध १ सय १४ रनको उत्कृष्ट शतकीय इनिङ खेलेका थिए ।

करणले नै तेस्रो ओभरको पाँचौं बलमा कप्तान मोनांक पटेललाई चार रनमा क्याच गराए । पटेल कभरमा आदिल अन्सारीबाट उत्कृष्ट क्याच आउट भएपछि अमेरिका ८-२ को अवस्थामा पुगेको थियो । पहिलो खेलमा टाई हुँदा टेलर र मोनांक पटेलले दोस्रो विकेटका लागि नेपालविरुद्ध दुई सय रनको दोहोरो शतकीय साझेदारी गरेका थिए ।

खराब सुरुवात गरेको अमेरिकालाई तेस्रो विकेटका लागि सुशान्त मोदानी र आरोन जोन्सले ८८ रनको साझेदारी गर्दै इनिङ उकासेका थिए । दीपेन्द्रसिंह ऐरीले २५ औं ओभरको पहिलो बलमा जोन्सलाई विकेटकिपर आसिफ शेखबाट ४३ रनमा क्याच गराउँदै साझेदारी तोडे ।

जोन्सले ६० बलमा ३ चौका प्रहार गरे । सन्दीप लामिछानेको बलमा सुशान्त देव खनालबाट ५४ रनमा क्याच भए । पाँचौं विकेटका लागि आरोन जोन्स र साइतेजा मुक्कामल्लाले ८५ रनको महत्वपूर्ण साझेदारी गरेका थिए । मुक्कामल्ला ५२ बलमा ३ चौकासहित ३६ रनमा आउट भए । निसर्ग पटेल १८ र क्यामरन स्टिभन्स १६ रनमा अविजित रहे ।

स्पिनर सागर ढकालले १० ओभरमा २१ रन खर्चिए । कप्तान सन्दीप लामिछानेले १० ओभरमा ४३ रन खर्चेर २ विकेट लिए । सोमपाल कामीले ९ ओभरमा ५७ रन खर्चेर १ विकेट लिए । करण केसीले ९ ओभरमा ६७ रन खर्चेर ३ विकेट लिए । दीपेन्द्रसिंह ऐरीको नाममा १ विकेट रह्यो ।