एजेन्सी – डेविड मिलर र रास्सी भान डर डुसेनको विष्फोटक ब्याटिङको सहयोगमा दक्षिण अफ्रिकाले पहिलो टि२० आई खेलमा भारतलाई ७ विकेटले पराजित गरेको छ । यो सँगै पाँच टि२० आई सिरिजमा दक्षिण अफ्रिकाले १–० को अग्रता लिएको छ ।

जितको लागि २ सय १२ रनको विशाल विजयी लक्ष्य पछ्याएको दक्षिण अफ्रिकाले १९.१ ओभरमा ३ विकेट गुमाउँदै पूरा गर्यो । दक्षिण अफ्रिकाले टि२० आईमा सफलता पूर्वक पूरा गरेको यो सर्वाधिक ठूलो योगफल हो । दक्षिण अफ्रिकाको यसअघि टि२० आईमा सर्वाधिक ठूलो योगफल २००७ मा वेस्टइन्डिजविरुद्ध २ सय ६ रन पूरा गरेको थियो ।

दक्षिण अफ्रिका जितमा डेविड मिलर ३१ बलमा ४ चौका र ५ छक्कासहित ६४ रनमा अविजित रहे । अनुभवी ब्याटर रास्सी भान डर डुसेन ४६ बलमा ७ चौका र ५ छक्कासहित ७५ रनमा अविजित रहे ।

चौथो विकेटका लागि मिलर र डुसेनले १ सय ३१ रनको सानदार शतकीय साझेदारी गर्दै दक्षिण अफ्रिकाको कीर्तिमानी जित हात पारे । ओपनर क्विन्टन डि कक २२ र टेम्बा बभुमा १० रनमा आउट भए । दक्षिण अफ्रिकाले धेरैलाई सरप्राइज दिँदै तीव्र गतिका बलिङ अलराउन्डर डवेन प्रिटोरियसलाई तेस्रो नम्बरमा पठाएको थियो ।

प्रिटोरियसले १३ बलमा १ चौका र ४ छक्का सहित २९ रन जोडे । भारतका हर्षल पटेल, भुवनेश्वर कुमार र अक्षर पटेलले १–१ विकेट लिए ।

त्यसअघि अरुण जेट्ली स्टेडियम दिल्लीमा टस हारेर ब्याटिङको निम्तो पाएको भारतले निर्धारित २० ओभरमा ४ विकेट गुमाउँदै २ सय ११ रन बनाएको थियो ।

भारतका ओपनर ईशान किशनले ४८ बलमा ११ चौका र ३ छक्कासहित सर्वाधिक ७६ रनको योगदान दिए । हार्दिक पान्ड्याले आक्रामक अन्त्य गर्दै १२ बलमा २ चौका र ३ छक्कासहित ३१ रनमा अविजित रहे ।

ओपनर ऋतुराज गाकवाड १५ बलमा ३ छक्कासहित २३ रनमा आउट भएका थिए । श्रेयस ऐरले २७ बलमा १ चौका र ३ छक्कासहित ३६ रन बनाए । कप्तान ऋषभ पन्त १६ बलमा २ चौका र २ छक्कासहित २९ रनमा आउट भए ।

दीनेश कार्तिक २ रनमा अविजित रहे । दक्षिण अफ्रिका केशव महाराज, एनरिच नोर्किया, ड्वेन प्रोटिरियोस र वेन पार्नेलले १–१ विकेट लिए ।भारत र दक्षिण अफ्रिकाबीच दोस्रो टि२० आई खेल आइतबार हुनेछ ।