ह्युस्टन, अमेरिका (हाम्रो खेलकुद) – कार्यवाहक कप्तान रोहित पौडेलको शतकमा नेपालले दोस्रो एकदिवसिय अभ्यास खेलमा ह्युस्टन हरिकेन्सलाई २ सय ५१ रनको बलियो लक्ष्य दिएको छ । प्रेर क्रिकेट भ्यू कम्प्लेक्समा टसमा हारेर ब्याटिङको निम्तो पाएको नेपाल ४९.१ ओभरमा २ सय ५० रनमा अल आउट भयो ।

नेपालका कप्तान रोहित पौडेलले ९० बलमा ५ चौका र ४ छक्कासहित सर्वाधिक १ सय १ रनको शतकीय इनिङ खेले । कमजोर सुरुवात गरेको नेपाललाई रोहितले सानदार शतकका साथ विशाल योगफलको आधार तय गरे । ८९ बलमा शतक प्रहार गरेका रोहित ३९ औं ओभरको दोस्रो बलमा रन आउट भए । रोहित आाउट भएपछि रनको गति घटेको थियो ।

आरिफ शेख र रोहित पौडेलले पाँचौं विकेटका लागि १ सय ८ रनको महत्वपूर्ण शतकीय साझेदारी गरेका थिए । आरिफ ६३ बलमा ३ चौकासहित ४१ रनमा आउट भए । नेपालको सुरुवात भने राम्रो रहन सकेन । ओपनर कुशल भर्तुेल तीव्र गतिका बलर हसन राशिदको दोस्रो ओभरको चौथो बलमा रमिज राजा जेआरबाट क्याच भए ।

दोस्रो विकेटका लागि देव खनाल र सुनिल धमलाले ३४ रनको साझेदारी गरे । धमला मोहम्मद इलायसको नवौं ओभरको तेस्रो बलमा धमला एज लागेर विकेटकिपर उस्मान राफिकबाट १३ रनमा क्याच भए । यसै ओभरको अन्तिम बलमा कभर डाइभ सट खेल्न खोजेका देव खनाल फस्ट स्लिपमा राजाबाट १९ रनमा क्याच भए । ३१ बल खेलेका देवले ४ चौका प्रहार गरे ।

कमजोर सुरुवात गरेको नेपाललाई चौथो विकेटका लागि रोहित र दीपेन्द्रसिंह ऐरीले ६० रनको साझेदारी गर्दै इनिङ उकासेका थिए । दीपेन्द्र स्पिनर हरमित सिंहको बलमा विकेटकिपर उस्मान वाफिकबाट २४ रनमा क्याच आउट भए । दीपेन्द्रले ३५ बलमा ३ चौका र १ छक्का प्रहार गरे ।

विनोद भण्डारी १३ बल खेल्दै ४, सुशान भारी ५ र करण केसी १२ रनमा आउट भए । हरिकेन्सका मोहम्मद इलियासले १० ओभरमा ६४ रन खर्चेर ५ विकेट लिए । हरमित सिंहले १० ओभरमा १ मेडनसहित २६ रन खर्चेर २ विकेट लिए ।