ह्युस्टन, अमेरिका (हाम्रो खेलकुद) – नेपालका कप्तान सन्दीप लामिछानेले पहिलो अभ्यास खेलमा नेपाली अल स्टार्सविरुद्ध पाँच विकेट लिएका छन् । जितको लागि १ सय ९१ रनको विजयी लक्ष्य पछ्याएको नेपाली अल स्टार्सले २१ ओभरमा ५ विकेट गुमाउँदै १ सय ९ रन बनाएको छ ।

पहिलो विकेटका लागि एन्ड्रिज गौस र उदय कौलले ८.४ ओभरमा ५५ रनको साझेदारी गर्दै राम्रो सुरुवात दिलाए । कप्तान सन्दीप लामिछानेको नवौं ओभरको चौथो बलमा ठूलो सट खेल्नेक्रममा कौल देव खनालबाट क्याच आउट भए । उनले २६ बलमा १३ बलमा २ चौकासहित १३ रन बनाए ।

११ औं ओभरको पाँचौं बलमा आक्रामक सुरुवात गरेका गौसलाई सन्दीपले बोल्ड गर्दै नेपाललाई खेलमा उत्कृष्ट पूनरागमन गराए । ३३ बलमा गौसले ९ चौका प्रहार गरे । लगत्तै अर्को बलमा पृथु बाँस्कोटालाई सन्दीपले विकेटकिपर विनोद भण्डारीबाट क्याच गराउँदै गोल्डेन डक पेभेलिएन फर्काए ।

सन्दीपले नितिश कुमारलाई ९ रनमा एलबीडब्लू आउट गरे । सन्दीपले मार्टिन कैनलाई १२ रनमा बोल्ड गर्दै पाँच विकेट पूरा गरेका हुन् । सन्दीपले ८ ओभरमा १ मेडनसहित ३२ रन खर्चेर ५ विकेट लिएका छन् ।

त्यसअघि अमेरिकाको ह्युस्टनमा रहेको पेरिरी भ्यू क्रिकेट कम्प्लेक्समा टस हारेर पहिला ब्याटिङको निम्तो पाएको नेपाल ४५.५ ओभरमा १ सय ९० रनमा अल आउट भएको थियो । नेपालका आरिफ शेखले ७४ बलमा ५ चौकासहित ६४ रनमा अविजित रहे ।