एजेन्सी – इन्डियन प्रिमियर लिग (आइपिएल) विश्वको सर्वाधिक लोकप्रिय फ्रेन्चाइज टि२० क्रिकेट प्रतियोगिता हो । आइपिएल खेल्ने धेरै स्टार खेलाडीको सपना हुन्छ । आइपिएलमा पाउने नाम र दामले गर्दा खेलाडीहरु आइपिएल खेल्न चाहन्छन् । धेरै खेलाडीहरुको सपना आफ्नो उत्कृष्ट प्रदर्शनको सहयोगमा टोलीलाई च्याम्पियन बनाउने हुन्छ । जुन सपना कमैले मात्र पूरा गर्न पाउँछन् ।

वेस्टइन्डिजका बायाँ हाते तीव्र गतिका बलर डोमिनिक ड्रेक्स भने २०२१ र २०२२ आइपिएलमा एकपनि खेल नखेली च्याम्पियन खेलाडी बन्न पुगे । २०२१ मा चेन्नई सुपर किंग्सले कोलकाता नाइट राइडर्सलाई २७ रनले हराउँदै चौथो आइपिएल उपाधि जितेको थियो ।

उक्त सिजनमा उनले एक खेल पनि खेल्ने मौका पाएनन् । लिगको अन्तिम समयतिर इंग्ल्यान्डका बायाँ हाते अलराउन्डर साम करण ब्याक इन्जुरीको कारण बाहिरिएपछि चेन्नईले ड्रेक्सलाई भित्र्याएको थियो । चेन्नईसँग तीव्र गतिका बलरमा जोश हेजलवुड र मध्यगतिमा ड्वेन ब्राभो हुँदा टोलीमा स्थान बनाउन सकेनन् । चेन्नईले ब्राभो, मोईन अली, हेजलवुड र फाफ डु प्लेसिसलाई पहिलो रोजाईमा मैदान उतारेको थियो ।

२०२२ मा गुजरात टाइटन्स च्याम्पियन बन्दा उनी टोलीमा थिए । हार्दिक पान्ड्याको अलराउन्ड प्रदर्शनमा फाइनलमा राजस्थान रोयल्सलाई ७ विकेटले हराउँदै गुजरात च्याम्पियन बनेको थियो । ड्रेक्सले दुई उपाधि लगातार दुई फरक टोलीमा रहँदै जिते । तर एकखेल पनि खेल्ने मौका पाएनन् ।

यस सिजनमा गुजरातले १ करोड १० लाख भारुमा किनेको थियो । अक्सनमा न्यूनतम मूल्य ७५ लाख भारु राखेपनि रोयल च्यालेन्जर्स बेंगलोरले रुचि देखाएपछि गुजरातले करोडको मूल्य तिर्नु परेको थियो ।

गुजरातले तीव्र गतिका बलरमा अल्जारी जोशेफ र लोकी फर्गुसन मध्य एकलाई खेलाउँदै आएको थियो । अन्य तीन विदेशी खेलाडीमा राशिद खान, डेविड मिलर र म्याथ्यु वेड थिए । त्यसैले मौका पाएनन् । ड्रेक्सले तल्लोक्रममा हिटिङको क्षमता पनि राख्ने गर्दछन् ।