एजेन्सी – इन्डियन प्रिमियर लिग (आइपिएल) २०२२ मा सानदार प्रदर्शन गरेपछि सिंगापुरका विष्फोटक ब्याटर टिम डेविडले अष्ट्रेलियाबाट अन्तर्राष्ट्रिय क्रिकेट खेल्ने उच्च सम्भावना रहेको छ । सिंगापुरमा जन्मिएका डेविडले अष्ट्रेलियाबाट घरेलु क्रिकेट खेल्ने गर्दछन् ।

सिंगापुरबाट अन्तर्राष्ट्रिय क्रिकेट खेली सकेका टिम डेविड आगमी अक्टोबर नोभेम्बरमा टि२० विश्वकपमा घरेलु टोली अष्ट्रेलिया टोलीमा हुने सम्भावना बढी छ । अष्ट्रेलिया सिमित ओभरका कप्तान आरोन फिन्चले त्यसको संकेत दिएका छन् । २०२१ मा टि२० विश्वकप च्याम्पियन विकेटकिपर म्याथ्यु वेडले डेविडले अष्ट्रेलियाबाट खेल्नेमा कुनै शंका नभएको बताएका छन् ।

मुम्बई इन्डियन्सबाट डेविडले यस सिजनको आइपिएलमा डेविडले ८ खेलमा २ सय १६ को स्ट्राइक रेटमा कुल १ सय ६८ रन बनाएका थिए । प्लेअफमा पुग्न दिल्लीले अन्तिम खेलमा मुम्बईलाई हराउनु पर्ने थियो । तर डेविडले ११ बलमा २ चौका र ४ छक्कासहित ३४ रन जोड्दै दिल्लीको प्लेअफमा तगारो बनेका थिए । हैदराबादविरुद्ध १८ बलमा ४६ रन जोडेका थिए ।

‘डेविड केहि समयको लागि उत्कृष्ट लयमा छन् । आइपिएलमा उनले अन्तिममा उत्कृष्ट अन्त्य गरे । बल प्रहार गर्ने क्षमता एकदमै दुर्लभ र कौशल हो’, सोमबार फिन्चले भने । त्यसैमा थपे, ‘पक्कैपनि हामीले उनलाई अर्को केहि समयमा हेर्ने छौं ।’

‘उनीसँग विश्वका कुनैपनि खेलाडी जतिकै शक्ति छ । उनले आइपिएलमा समाप्त गरेकोमा म खुसी छु’, वेडले भनेका छन् । ‘यो विश्वकप होस् वा अर्को विश्वकप उनीसँग प्रशस्त समय छ । उनले अष्ट्रेलियाको लागि क्रिकेट खेल्ने छन् । यसमा कुनै शंका छैन’, वेडले भनेका छन् ।

अष्ट्रेलियाबाट मौका नपाएपछि डेविडले २०१९ मा सिंगापुरबाट क्रिकेट खेलेका थिए । जसक्रममा टि२० विश्वकप एसिया छनोटमा डेविडले नेपालविरुद्ध ७७ रनको इनिङ खेल्दै नेपालको टि२० विश्वकप सपना समाप्त पारेका थिए । उक्त प्रदर्शन बारे उनको जीवनीबारे लेखिएको लेख :

अष्ट्रेलियन डेविड जसले सिंगापुरलाई विश्वकपनजिक पुर्याए