एजेन्सी – कप्तान हार्दिक पान्ड्याको उत्कृष्ट बलिङको सहयोगमा राजस्थान रोयल्सले इन्डियन प्रिमियर लिग (आइपिएल) २०२२ को फाइनलमा गुजरात टाइटन्सलाई १ सय ३१ रनको सामान्य लक्ष्य दिएको छ । नरेन्द्र मोदी स्टेडियम अहमदाबादमा टस जितेर ब्याटिङ रोजेको राजस्थानले निर्धारित २० ओभरमा ९ विकेट गुमाउँदै १ सय ३० रन बनायो ।

राजस्थानका ओपनर जस बटलरले ३५ बलमा ५ चौकासहित सर्वाधिक ३९ रन बनाए । राजस्थानलाई ओपनर यशस्वी जैसवाल र जस बटलरले पहिलो विकेटका लागि ४ ओभरमा ३१ रनको साझेदारी गरेका थिए । जैसवाल यश दयालको बलमा डीप स्क्वायर लेगमा साई किशोरबाट क्याच हुनुअघि १६ बलमा १ चौका र २ छक्कासहित २२ रन बनाए ।

हार्दिक पान्ड्याको नवौं ओभरको दोस्रो बलमा कप्तान सञ्जु स्यामसन एज लागेर थर्डम्यानमा किशोरबाट १४ रनमै आउट भए । सञ्जुको विकेट नै गुजरातको लागि टर्निङ प्वाइन्ट बन्यो । राशिद खानको १२ औं ओभरको पाँचौं बलमा देवदत्त पाडिक्कल १० बल खेल्दै दुई रनमा आउट भए ।

हार्दिकको १३ औं ओभरको पहिलो बलमा जस बटलर आउट साइड एज लागेर ऋद्धिमान शाहबाट क्याच भएपछि राजस्थान समस्यामा परेको थियो । शिम्रन हेटमायर ११, रविचन्द्रन आश्विन ६ र ट्रेन्ट बोल्ट ११ रनमा आउट भए । रियान पराग १५ रनमा आउट भए ।

गुजरातका कप्तान हार्दिक पान्ड्याले ४ ओभरमा १७ रन खर्चेर ३ विकेट लिए । स्पिनर रविश्रिनिवास साइ किशोरले २ ओभरमा २० रन खर्चेर २ विकेट लिए । मोहम्मद शामी, राशिद खान र यश दयालले १–१ विकेट लिए ।