एजेन्सी – इन्डियन प्रिमियर लिग (आइपिएल) २०२२ को दोस्रो क्वालिफायरमा आज राजस्थान रोयल्स र रोयल च्यालेन्जर्स बेंगलोरबीच प्रतिस्पर्धा हुँदैछ । खेल नेपाली समय अनुसार साँझ ७ : ४५ मा नरेन्द्र मोदी स्टेडियम अहमदाबादमा सुरु हुनेछ । आजको विजेता टोली फाइनलमा पुग्नेछ ।

राजस्थान पहिलो क्वालिफायरमा गुजरात टाइटन्ससँग ७ विकेटले पराजित हुँदै बाहिरिएको थियो । अन्तिम ६ बलमा १६ रन चाहिँएको अवस्थामा डेविड मिलरले प्रसिद्ध कृष्णलाई सुरुवाती तीन बलमा लगातार छक्का प्रहार गर्दै गुजरातलाई फाइनलमा पुर्याएका थिए । बेंगलोर भने एलिमिनेटर खेलमा लखनऊ सुपर जायन्ट्सलाई १४ रनले हराउँदै दोस्रो क्वालिफायरमा स्थान बनाएको हो ।

बेंगलोरले सन् २०१६ पछि हालसम्म फाइनल खेल्न सकेको छैन । राजस्थान पहिलो संस्करणको २००८ को आइपिएल च्याम्पियनपछि फाइनल सम्मको यात्रा तय गर्न सकेको छैन । राजस्थानमा यस सिजनमा सर्वाधिक रन बनाउने ब्याटर जस बटलर र विकेटलिने बलर स्पिनर युजभेन्द्र चहल छन् ।

जस बटलरले १५ खेलमा ३ मा शतक र ४ मा अर्धशतक सहित कुल ७ सय १८ रन बनाएका छन् । चहल २६ विकेटका साथ शीर्षस्थानमा छन् । बटलरले पछिल्लो खेलमा गुजरातविरुद्ध ८९ रनको इनिङ खेलेका थिए । उनको लय र प्रदर्शन आजको खेलमा धेरै महत्वपूर्ण हुने गर्दछ । बटलर सुरुवाती केहि समय लिँदै अन्तिममा विष्फोटक अन्त्य गर्दै आएका छन् ।

मध्यक्रममा सञ्जु स्यामसन र शिम्रन हेटमायरको प्रदर्शनले धेरै महत्वपूर्ण राख्नेछ । अहमदाबाद स्पिनर उपयोगी पिच मानिन्छ । त्यसैले दुबै टोलीको स्पिनरको प्रदर्शन महत्वपूर्ण हुनेछ । तुलनात्मक रुपमा बेंगलोर भन्दा राजस्थानको स्पिन आक्रामण मजबुत छ । राजस्थानका दुई स्पिनर रविचन्द्रन आश्विन र चहल घातक बन्न सक्छन् ।

तीव्र गतिका बलर ट्रेन्ट बोल्ट, आबेद म्याकोय र प्रसिद्ध कृष्ण हुनेछन् । प्रसिद्ध कृष्णको स्थानमा कुलदीप सेन वा नवदीप सैनी मध्य एकलाई मौका दिनसक्छ । यता बेंगलोरले एलिमिनेटरमा लखनऊलाई हराउन शीर्षक्रमका ब्याटर रजत पाटिदारलो १ सय १२ रनको सानदार शतकीय इनिङ खेलेका थिए ।

तर उनीसँगै प्रमुख ब्याटर विराट कोहली, फाफ डु प्लेसिस र ग्लेन म्याक्सवेलको उत्कृष्ट प्रदर्शन गर्नुपर्ने हुन्छ । फिनिसरमा दीनेश कार्तिकले सादार प्रदर्शन गर्दै आएका छन् । उनी घातक बन्नसक्छन् । स्पिनर वानिन्दु हसरंगा बेंगलोरका हतियार हुन् । उनले जारी सिजनमा २५ विकेट लिई सकेका छन् ।

पर्पल क्यापको दौडमा रहेका उनीको प्रदर्शन मध्यक्रममा महत्वपूर्ण हुनेछ । बेंगलोरको डेथ ओभर बलिङ उत्कृष्ट छ । जोश हेजलवुड र हर्षल पटेलले उत्कृष्ट प्रदर्शन गर्दै आएका छन् । हर्षलले १९ र हेजलवुडले यस सिजनमा १८ विकेट लिएका छन् । आजको विजेताले फाइनलमा आइतबार गुजरातसँग प्रतिस्पर्धा गर्नेछ ।

हेड टु हेड :

आइपिएलमा राजस्थान र बेंगलोरबीच कुल २७ खेल भएका छन् । राजस्थान ११ र बेंगलोर १३ खेलमा विजयी भएका छन् । जारी सिजनका दुई खेलमा दुबै टोली एक एक खेलमा विजयी भएका छन् ।

पहिलो खेलमा बेंगलोर ४ विकेटले विजयी हुँदा दोस्रो खेलमा २९ रनले पराजित भएको थियो । पछिल्ला पाँच प्रतिस्पर्धामा बेंगलोर चार खेलमा विजयी भएको छ ।