एजेन्सी – ओपनर जस बटलरको सानदार ब्याटिङमा राजस्थान रोयल्सले इन्डियन प्रिमियर लिग (आइपिएल) २०२२ को पहिलो क्वालिफायरमा गुजरात टाइटन्सलाई १ सय ८९ रनको विशाल लक्ष्य दिएको छ ।

इडेन गार्डेन कोलकातामा टस हारेर ब्याटिङको निम्तो पाएको राजस्थानले निर्धारित २० ओभरमा ६ विकेट गुमाउँदै १ सय ८८ रन बनायो । राजस्थानका ओपनर जस बटलरले ५६ बलमा १२ चौका र २ छक्कासहित सर्वाधिक ८९ रनमा आउट भए ।

बटलर अन्तिम ओभरको अन्तिम नो बलमा दुई रन लिनेक्रममा रन आउट भएका थिए । बटलरले १६ ओभरको समाप्तिमा ३८ बलमा ३९ रन मात्र बनाएका थिए । त्यसपछि भने बटलरले आफ्नो खेल्ने शैली परिवर्तन गर्दै आक्रामक ब्याटिङका साथ बलियो योगफलमा पुर्याए ।

ओपनर यशस्वी जैसवाल यश दयालको दोस्रो ओभरको अन्तिम बलमा एज लागेर दुई रनमा क्याच आउट भए । दोस्रो विकेटका लागि बटलर र सन्जु स्यासमनले ६८ रनको साझेदारी गर्दै इनिङ उकासेका थिए । सुरुवात देखिनै आक्रामक ब्याटिङ गरेका स्यामसनले २६ बलमा ५ चौका र ३ छक्कासहित ४७ रनमा आउट भए ।

स्पिनर रविश्रीनिवास साई किशोरको बलमा स्यामसन दशौं ओभरको पाँचौं बलमा लङअफमा अल्जारी जोशेफबाट क्याच भए । हार्दिक पान्ड्याको बलमा बोल्ड हुनुअघि देवदत्त पाडिक्कलले २० बलमा २ चौका र २ छक्कासहित २८ रन बनाए ।

गुजरातका राशिद खानले ४ ओभरमा १५ रन खर्चे । मोहम्मद शामी, यश दयाल, हार्दिक पान्ड्या र साई किशोरले १–१ विकेट लिए । रियान पराग र शिम्रन हेटमायर ४–४ रनमा आउट भए ।