एजेन्सी – लखनऊ सुपर जायन्ट्सका ओपनर क्विन्टन डि कक र लोकेश राहुलले इन्डियन प्रिमियर लिग (आइपिएल) मा दुई दुर्लभ कीर्तिमान बनाएका छन् । आइपिएल २०२२ को ६६ औं खेलमा कोलकाता नाइट राइडर्सलाई २ सय ११ रनको विशाल लक्ष्य दिनेक्रममा दुई कीर्तिमान बनाएका हुन् ।

डिवाई पाटिल स्पोर्ट्स एकेडेमी मुम्बईमा टस जितेर पहिला ब्याटिङ थालेको लखनऊले निर्धारित २० ओभरमा कुनै विकेट नगुमाई २ सय १० रन बनायो । लखनऊका विकेटकिपर तथा ओपनर डि कक ७० बलमा १० चौका र १० छक्कासहित सर्वाधिक १ सय ४० रनमा अविजित रहे । कप्तान लोकेश राहुल ५१ बलमा ३ चौका र ४ छक्कासहित ६८ रनमा अविजित रहे ।

आइपिएल इतिहासमा २ सय १० रन ओपनरले गरेको सर्वाधिक ठूलो साझेदारी हो । सन् २०१९ मा सनराइजर्स हैदराबादका जोनी बेयरस्टो र डेविड वार्नरले बेंगलोरविरुद्ध पहिलो विकेटका लागि १ सय ८६ रनको साझेदारी गरेका थिए । जुन पहिलो विकेटका लागि आइपिएलको उच्च साझेदारी रहँदै आएको थियो ।

त्यस्तै आइपिएल इतिहासको तेस्रो ठूलो साझेदारीमा पर्दछ । सर्वाधिक ठूलो साझेदारी बेंगलोरका विराट कोहली र क्रिस गेलले २०१६ मा गुजरात लायन्सविरुद्ध दोस्रो विकेटका २ सय २९ रनको गरेका थिए । त्यस्तै बेंगलोरका विराट कोहली र एवि डिभिलियर्सले दोस्रो विकेटका लागि सन् २०१५ मा मुम्बईविरुद्ध २ सय १५ रनको अविजित साझेदारी गरेका थिए । जुन दोस्रो ठूलो साझेदारी हो ।

त्यस्तै आइपिएल इतिहासमा पहिलो पटक ओपनरले पुरै २० ओभर खेलेका छन् । यसअघि कुनैपनि संस्करणमा ओपनरले पुरै २० ओभर भने खेलेका थिएनन् । डि ककको १ सय ४० रनको इनिङ एक ब्याटरले आइपिएलमा बनाएको तेस्रो ठूलो रन हो । क्रिस गेलले सन् २०१३ मा बेंगलोरबाट पुणे वारियर्सविरुद्ध बनाएको अविजित १ सय ७५ रन आइपिएल इतिहासको सर्वाधिक ठूलो इनिङ हो ।

जुन आइपिएल मात्र नभएर टि२० इतिहासमा एक ब्याटरको हालसम्म बनाएको उत्कृष्ट प्रदर्शन रहँदै आएको छ । आइपिएलको दोस्रो ठूलो इनिङ कोलकाताबाट ब्रेन्डन म्याकुलमले २००८ मा बेंगलोरविरुद्ध १ सय ५८ रनको अविजित शतक प्रहार गरेका थिए ।