एजेन्सी – तीव्र गतिका बलर शार्दुल ठाकुर र शीर्षक्रमका ब्याटर मिचेल मार्शको उत्कृष्ट प्रदर्शनमा दिल्ली क्यापिटल्सले इन्डियन प्रिमियर लिग (आइपिएल) २०२२ मा पन्जाब किंग्सलाई १७ रनले पराजित गरेको छ । यो जितसँगै दिल्ली १४ अंकका साथ चौथो स्थानमा उक्लिदै प्लेअफको सम्भावना कायमै राखेको छ ।

जितको लागि १ सय ६० रनको विजयी लक्ष्य पछ्याएको पन्जाबले निर्धारित २० ओभरमा ९ विकेट गुमाउँदै १ सय ४२ रन बनायो । पन्जाबका विकेटकिपर जितेश शर्माले ३४ बलमा ३ चौका र २ छक्कासहित सर्वाधिक ४४ रन बनाए । राहुल चाहर २४ बलमा २ चौका र १ छक्कासहित २५ रनमा अविजित रहे ।

ओपनर जोनी बेयरस्टो १५ बलमा ४ चौका र १ छक्कासहित २८ रनमा आउट भए । शिखर धवन १९, भानुका राजपक्षे ४, लियाम लिभिङस्टोन ३ र मयंक अग्रवाल शून्यमा आउट भए । स्पिनर कुलदीप यादवको आठौं ओभरको अन्तिम बलमा पन्जाबका प्रमुख ब्याटर लियाम लिभिङस्टोन स्टम्पिङ आउट भएपछि जित कठिन बनेको थियो ।

हरप्रीत ब्रार १ र ऋषि धवन ४ रनमा आउट भए दिल्लीका शार्दुल ठाकुरले ४ ओभरमा ३६ रन खर्चेर ४ विकेट लिए । स्पिनर अक्षर पटेलले ४ ओभरमा १४ रन खर्चेर २ विकेट लिए । स्पिनर कुलदीप यादवले ३ ओभरमा १४ रन खर्चेर २ विकेट लिए ।

त्यसअघि डिवाई पाटिल स्पोर्ट्स एकेडेमी मुम्बईमा टस हारेर ब्याटिङको निम्तो पाएको दिल्लीले निर्धारित २० ओभरमा ७ विकेट गुमाउँदै १ सय ५९ रन बनाएको थियो । दिल्लीका मिचेल मार्शले ४८ बलमा ४ चौका र ३ छक्कासहित सर्वाधिक ६३ रन बनाए । मार्श बाहेक अन्य ब्याटरले राम्रो रन बनाउन सकेनन् ।

ओपनर डेविड वार्नर इनिङको पहिलो बलमै रोेयल डक आउट भए । स्पिनर लियाम लिभिङस्टोनको बलमा वार्नर राहुल चाहरबाट क्याच भए । अर्का ओपनर शरफराज खान १६ बलमा ५ चौका र १ छक्कासहित ३२ रनमा आउट भए । ललित यादव २४, ऋषभ पन्त ७, रोभम्यान पावेल २ र शार्दुल ठाकुर ३ रनमा आउट भए । अक्षर पटेल २० बलमा १७ रन र कुलदीप यादव २ रनमा अविजित रहे ।

पन्जाब किंग्सका अर्शदीप सिंहले ४ ओभरमा ३७ रन खर्चेर ३ विकेट लिए । लियाम लिभिङस्टोनले ४ ओभरमा २७ रन खर्चेर ३ विकेट लिए ।

दिल्लीले अव अन्तिम खेल २१ मे मा मुम्बई इन्डियन्ससँग खेल्नेछ । उक्त खेलमा विजयी हुँदा १६ अंक हुनेछ । दिल्लीसँगै १६ अंकका साथ रोयल च्यालेन्जर्स बेंगलोर पनि प्लेअफमा पुग्ने सोचमा छ । बेंगलोरले १९ मेमा शीर्षस्थानको गुजरात टाइटन्ससँग खेल्नेछ । उक्त खेलमा बेंगलोर पराजित भएमा र दिल्ली विजयी भएमा सहजै प्लेअफमा पुग्नेछ । अन्यथा नेटरनरेटमा निर्भर रहनुपर्छ ।

पन्जाबले अन्तिम खेल २२ मे मा सनराइजर्स हैदराबादसँग खेल्नेछ । पन्जाब प्ले अफमा पुग्न अन्तिम खेलमा नाटकीय नतिजा आउनुपर्छ । अन्तिम खेलमा दिल्ली, बेंगलोर र कोलकाता भारी अन्तरले पराजित हुँदा र पन्जाबले फराकिलो जित हात पार्न सके १४ अंकका साथ अन्तिम चारमा रहँदै प्लेअफमा पुग्न सक्छ ।

अंक तालिका

गुजरात १३ खेलमा १० मा जित र ३ मा हारका २० अंक जोड्दै शीर्ष स्थानमम छ । राजस्थान रोयल्स १३ खेलमा ८ मा जित र ५ मा हार सहित १६ अंकका साथ दोस्रो स्थानमा छ । लखनऊ १३ खेलमा ८ मा जित र ५ मा हार सहित १६ अंकका साथ तेस्रो स्थानमा छ ।

दिल्ली १३ खेलमा ७ मा जित र ६ मा हार सहित १४ अंक जोड्दै चौथो स्थानमा उक्लिएको छ । बेंगलोर १३ खेलमा ७ मा जित र ६ मा हार सहित १४ अंकका साथ पाँचौं स्थानमा छ । कोलकाता नाइट राइडर्स १३ खेलमा ६ मा जित र ७ खेलमा हार सहित छैटौं स्थानमा छ ।

पन्जाब १३ खेलमा ७ मा जित र ६ मा हार बेहोर्दै १२ अंक जोड्दै साथ सातौं स्थानमा छ । हैदराबाद १२ खेलमा ५ मा जित र ७ मा हार सहित आठौं स्थानमा छ । चेन्नई १३ खेलमा ४ मा जित र ९ मा हार सहित नवौं स्थानमा छ । मुम्बई १२ खेलमा ३ मा जित र ९ मा हार सहित पुछारमा छ ।