काठमाडौं (हाम्रो खेलकुद) – युवा अलराउन्डर बसिर अहमदले जिम्बावे ए सँगको पहिलो टि२० अभ्यास खेलमा नेपालको प्लेइङ ११ मा रहेका छन् । टियु क्रिकेट मैदानमा जिम्बावे ए का कप्तान टोनी मुनयोङ्गा टस जितेर पहिला फिल्डिङ गर्ने निर्णय लिएका हुन् ।

नेपालले टोलीमा बसिर अहमदलाई मौका दिएको छ । सिनियर टोलीमा डेब्यू गर्न बाकी रहेका बायाँ हाते अलराउन्डर बसिर पहिलो पटक खेल्न लागेका हुन् । यो सिरिजले टि२० मान्यता नपाएको हुँदा अभ्यास मात्र मानिनेछ ।

केहि साता अघि बशिर अहमद भैरहवामा सम्पन्न प्रो क्लब च्याम्पियनसिपका सर्वोत्कृष्ट खेलाडी (प्लेयर अफ द सिरिज) चुनिएका थिए । रुपन्देही(११ लाई च्याम्पियन बनाउन बशिरले सानदार अलराउन्ड प्रदर्शन गरेका थिए ।

रुपन्देहीले फाइनलमा मलेसिया सिनियर टोलीलाई ७ विकेटले हराउँदै च्याम्पियन बनेको थियो । बशिरले प्रतियोगिताभर ५ खेलमा १ सय १९ रन बनाउनुको साथै १० विकेट लिए । बशिर स्पिनसँगै तल्लोक्रममा आक्रामक ब्याटिङको क्षमता बढी राख्ने गर्दछन् ।

नेपालले वर्षाको कारणनै एकदिवसियलाई पछि सारेर टि२० अघि गर्न लागेको हो । नेपाल घरेलु मैदान, समर्थक र पछिल्लो लयलाई निरन्तरता दिँदै टेस्ट टोली जिम्बावे ए लाई हराउने सोचमा छ । तर सिनियर टोलीबाट खेलि सकेका ८ खेलाडी सम्मिलित जिम्बावेको ए टोलीलाई हराउन सहज भने हुने छैन । जिम्बावे पनि नेपाललाई घरेलु समर्थक सामू स्तब्ध पार्न चाहन्छ ।

नेपालको प्लेइङ ११ :

सन्दीप लामिछान (कप्तान), आसिफ शेख, रोहित पौडेल, दीपेन्द्रसिंह ऐरी, आरिफ शेख, आदिल अन्सारी, करण केसी, सोमपाल कामी, कुशल भुर्तेल, अभिनाश बोहरा, बसिर अहमद ।