एजेन्सी – स्पिनर कुलदीप यादवले मध्यक्रम ध्वस्त बनाउँदा कोलकाता नाइट राइडर्सले इन्डियन प्रिमियर लिग (आइपिएल) २०२२ मा दिल्ली क्यापिटल्सलाई १ सय ४७ रनको औसत लक्ष्य दिएको छ ।

वानखडे स्टेडियम मुम्बईमा टस हारेर पहिला ब्याटिङ थालेको कोलकाताले निर्धारित २० ओभरमा ९ विकेट गुमाउँदै १ सय ४६ रन बनायो । कोलकाताका नितिश राणाले ३४ बलमा ३ चौका र ४ छक्कासहित सर्वाधिक ५७ रन बनाए । कप्तान श्रेयस ऐर ३७ बलमा ४ चौकासहित ४२ रनमा आउट भए ।

दिल्लीको लागि पहिलो खेल खेलेका युवा तीव्र गतिका बलर चेतन सकारियाले दोस्रो ओभरको तेस्रो बलमा ओपनर आरोन फिन्चलाई ३ रनमा बोल्ड आउट गरे । अर्का वेंकटेश ऐर १२ बलमा ६ रन बनाउँदै क्याच भए । त्यसपछि कुलदीपले चार विकेट लिँदै कोलकातालाई ८३–६ को संकटमा पुर्याए ।

डेब्यू खेल खेलेका विकेटकिपर बाबा इन्द्रजितलाई कुलदीपले आठौं ओभरको दोस्रो बलमा लङअनमा रोभम्यान पावेलबाट ६ रनमा क्याच गराए । लगत्तै अर्को बलमा सुनिल नारायण एलबीडब्लूको शिकार बने । १४ औं ओभरमा कुलदीपले दुई महत्वपूर्ण विकेट लिदै कोलकातालाई दयनीय अवस्थामा पुर्याए ।

पहिलो बलमा श्रेयस ऐर ऋषभ पन्तबाट क्याच भए । चौथो बलमा आन्द्रे रसेल शून्यमा स्टम्पिङ आउट भएपछि कोलकाता ८३–६ को अवस्थामा पुगेको थियो । सातौं विकेटका लागि रिन्कु र नितिश राणाले ६२ रनको साझेदारी गर्दै इनिङ उकासेका थिए ।

रिन्कु १६ बलमा ३ चौकासहित २३ रनमा आउट भए । कोलकाताका स्पिनर कुलदीप यादवले ३ ओभरमा १४ रन खर्चेर ४ विकेट लिए । मुश्ताफिजुर रहमानले ४ ओभरमा १८ रन खर्चेर ३ विकेट लिए । चेतन सकारिया र अक्षर पटेलले १–१ विकेट लिए ।