एजेन्सी – इन्डियन प्रिमियर लिग (आइपिएल) २०२२ मा लगातार आठ खेल हारेको मुम्बई इन्डियन्सले स्पिनर कुमार कार्तिकेय सिंहलाई अनुबन्ध गरेको छ । २४ वर्षीय बायाँ हाते तीव्र गतिका बलर मोहम्मद अर्शद खान घाइते भएपछि उनको स्थानमा कुमारलाई अनुबन्ध गरेको हो ।

मध्य प्रदेशबाट घरेलु क्रिकेट खेल्ने कुमारले ९ प्रथम श्रेणी, १९ लिष्ट ए र ८ टि२० आई खेल खेलेका छन् । टि२० क्रिकेटमा उनले ९ विकेट लिएका छन् । उनले पछिल्लो समय भारतीय घरेलु क्रिकेटमा राम्रो प्रदर्शन गरेका छन् ।

२४ वर्षीय कुमारले शनिबार राजस्थान रोयल्ससँग डेब्यू गर्नसक्छन् । पाँच पटकको च्याम्पियन मुम्बईको यस सिजनमा बलिङ आक्रामण कमजोर छ । तीव्र गतिका बलर जस्प्रित बुमराहले ८ खेलमा ५ विकेट, स्पिनर मुरुगन आश्विनले ६ खेलमा ६ विकेट, जयदेव उनादकटले ५ खेलमा ६ विकेट, ड्यानिल साम्स र टाइमल्स मिल्सले ६–६ विकेट लिएका छन् ।

मुम्बईको प्लेअफ समिकरण अनौपचारिक रुपमा बाहिरि सकेको छ । मुम्बईले बाँकी ६ खेलमा जित निकाल्दा १२ अंक हुनेछ । १२ अंक प्लेअफमा पुग्न पर्याप्त देखिदैन ।

अंक तालिका

गुजरात ८ खेलमा ७ मा जित र १ मा हारका १४ अंक जोड्दै शीर्ष स्थानमा छ । राजस्थान रोयल्स ८ खेलमा ६ मा जित र २ मा हार सहित १२ अंकका साथ दोस्रो स्थानमा छ । हैदराबाद ८ खेलमा ५ मा जित र ३ मा हार सहित १० अंकका साथ तेस्रो स्थानमा छ । लखनऊ ८ खेलमा ५ मा जित र ३ मा हार सहित चौथो स्थानमा छ ।

बेंगलोर ९ खेलमा ५ मा जित र ४ मा हार सहित १० अंकका साथ पाँचौं स्थानमा छ । पन्जाब ८ खेलमा ४ मा जित र ४ मा हार सहित छैटौं स्थानमा छ । दिल्ली ७ खेलमा ३ मा जित र ४ मा हार सहित सातौं स्थानमा छ । कोलकाता नाइट राइडर्स ८ खेलमा ३ मा जित र ५ मा हार सहित आठौं स्थानमा छ । चेन्नई ८ खेलमा २ मा जित र ६ मा हार सहित नवौं स्थानमा छ । मुम्बई ८ खेलमा जित बिहीन हुँदै पुछारमा छ ।