एजेन्सी – आगमी अक्टोबर नोभेम्बरमा अष्ट्रेलियामा हुने आइसिसी टि२० विश्वकप २०२२ सुरु हुन ६ महिना बाँकी छ । विश्वकपलाई सबै टोली निर्माणको तयारीमा जुटेका छन् । भारत उपाधिको दाबेदार टोली हो । तर विश्वकप सुरु हुन ६ महिना बाँकी रहँदा भारतलाई चिन्ता सुरु भएको छ ।

इन्डियन प्रिमियर लिग (आइपिएल) २०२२ भारतमा जारी छ । प्रमुख खेलाडी आइपिएलमा ब्यस्त हुँदा अन्तर्राष्ट्रिय ठूला टोलीले वर्तमान समयमा सिरिज खेलेका छैनन् । भारतका प्रमुख खेलाडीको लय र प्रदर्शन खराब छ । भारतका प्रमुख खेलाडी विराट कोहली, कप्तान रोहित शर्मा, ईशान किशन, जस्प्रित बुमराह र रविन्द्र जडेजा करिअरको खराब समय सामना गरेका छन् ।

पाँच पटकको च्याम्पियन मुम्बईले सुरुवाती ८ खेलमा जित निकाल्न सकेको छैन । रोहित, ईशान र बुमराहको कमजोर प्रदर्शन मुम्बईले इतिहासकै खराब नतिजा आउनुको एक कारणमा पर्दछ । भारतसँग ईशानको विकल्प छ । तर बुमराह र रोहितको कल्पना गर्न सक्दैन ।
बुमराहले ८ खेलमा पाँच विकेट लिएका छन् । पाँच खेलमा विकेट विहीन बन्दा राजस्थान रोयल्सविरुद्ध ३ विकेट लिएका थिए ।

विश्व क्रिकेटका एक उत्कृष्ट डेथ ओभर स्पेलिष्ट र योर्करले प्रसिद्ध बुमराहले संघर्ष गरेका छन् । बुमराहले विश्वस्तरिय तीव्र गतिका बलरबाट राम्रो साथ नपाउँदा खराब प्रदर्शन गरेको अनुमान गर्न सकिन्छ । कप्तान रोहितले १९.१२ को औसतमा १ सय ५३ रन बनाएका छन् । रोहित ३९, ०, ६, २८, २६, ३, १० र ४१ रनमा आउट भएका छन् ।

किशनले ८ खेलमा २८.४२ को औसतमा १ सय ९९ रन बनाएका छन् । ईशानले ८, ०, १३, ३, २६, १४, ५४ र ८१ रन जोडेका छन् । रोयल च्यालेन्जर्स बेंगलोरका विराट कोहली दुई खेलमा लगातार गोल्डेन डक आउट भए । ९ खेलमा कोहलीले १६ को औसतमा १ सय २८ रनमा आउट भएका छन् । कोहली ९, ०,०, १२, १, ४८, ५, १२ र ४१ रन बनाएका छन् । जडेजाले ८ खेलमा १ सय १२ रन बनाउँदा ५ विकेट लिएका छन् ।

भारतको विश्वकपमा राहुल र रोहित शर्माले ओपनिङ गर्ने सम्भावना छ । लखनऊ सुपर जायन्ट्सका कप्तान राहुलले भने दुई शतकका साथ राम्रो लयमा छन् । कप्तान रोहित नै खराब लयमा छन् । कोहली तेस्रो नम्बरका खेलाडी हुन् । तर कोहलीको खराब लयले उनको टि२० आई करिअरमाथि प्रश्न उठ्छ ।

विराट लगातार दुई खेलमा गोल्डेन डक भएपछि बेंगलोरले राजस्थानविरुद्ध ओपनिङमा ल्याएपनि ९ रनमा आउट हुन पुगे । जडेजा र बुमराहको प्रदर्शन पनि त्यतिनै कमजोर छ । रोहित र जडेजामा कप्तानी दबाब झल्किन्छ । अन्य खेलाडी खराब लयले मानसिक रुपमा पनि दबाबमा छन् ।

भारत विश्वकपको दाबेदार टोली हो । गत अक्टोबर नोभेम्बरमा युएईमा भएको टि२० विश्वकपमा भारत समूह चरणबाटै बाहिरिएको थियो । उक्त विश्वकपमा भारत पाकिस्तान र न्युजिल्यान्डसँग पराजित हुँदै समूह चरणबाटै घर फर्किनु परेको थियो । सन् २००७ को टि२० विश्वकप च्याम्पियन भारतले त्यसपछि यस शैलीमा उपाधि जित्न सकेको छैन ।

विश्वकपमा प्रमुख खेलाडीको लय र मनोबलले आफ्नो टोली मात्र नभएर विपक्षीलाई ठूलो प्रभाव पार्दछ । तर भारतीय केहि प्रमुख खेलाडी भने ६ महिना बाँकी हुँदा खराब लयबाट गुज्रिएका छन् । आगमी विश्वकप सम्म खराब लयले निरन्तरता पाउने हो की भन्ने चिन्ता भारतललाई अहिले नै सताउन थालेको छ ।

टि२० विश्वकप २०२२ आगमी अक्टोबर १६ देखि नोभेम्बर १३ सम्म अष्ट्रेलियाका विभिन्न सहरमा हुनेछ । भारत सुपर १२ को समूह बी मा छ । भारतसँगै पाकिस्तान, बंगलादेश, दक्षिण अफ्रिका, पहिलो चरणको समूह बी को विजेता र समूह ए को उपविजेता हुनेछन् । भारतले पहिलो खेल अक्टोर २३ मा पाकिस्तानसँग खेल्नेछ ।