एजेन्सी – मुम्बई इन्डियन्सका कप्तान रोहित शर्माले इन्डियन प्रिमियर लिग (आइपिएल) २०२२ को सिजन आफूहरुले चाहे जस्तो नगएको बताएका छन् । आइतबार राती पाँच पटकको च्याम्पियन मुम्बईले लगातार आठौं खेलमा हारपछि रोहितले उक्त प्रतिक्रिया दिएका हुन् ।

आइतबार लखनऊ सुपर जायन्ट्सँग ३६ रनले पराजित भएसँगै मुम्बईको प्ले अफ सम्भावना लगभग सकिएको छ । ‘मलाई लाग्छ हामीले यस खेलमा राम्रो बलिङ गर्यौ । यो सजिलो थिएन । ब्याटिङ गर्न पिच राम्रो थियो । मैले सोचे यो लक्ष्यलाई पूरा गर्नुपर्छ । तर हामीले राम्रो ब्याटिङ गर्न सकेनौं’, लखनऊसँग हारपछि रोहितले भने ।

जितको लागि १ सय ६९ रनको मध्यम विजयी लक्ष्य पछ्याएको मुम्बई २० ओभरमा ८ विकेट गुमाउँदै १ सय ३२ रन बनायो । ‘जब तपाईंसँग यस्तो लक्ष्य छ । त्यहाँ एउटा राम्रो साझेदारीको आवश्यक पर्छ । तर मध्यक्रममा केहि गैरजिम्मेवारी सटहरु भए । त्यसमा मेरो पनि छ । त्यसैले हामीले गति पाएनौंं’, रोहितले भने । त्यसैमा थपे, ‘तिनीहरुले वास्तवमै राम्रो बलिङ गरे । हामीहरुले यो प्रतियोगिताभर राम्रो ब्याटिङ गर्न सकेनौं ।’

रोहितले मध्यक्रममा खेल्ने ब्याटरले जिम्मेवारी लिनुपर्ने बताउँछन् । ‘ मध्यक्रममा खेल्ने जो सुकै खेलाडीले त्यो जिम्मेवारीका साथ ठूलो इनिङ खेल्नुपर्छ । केहि विपक्षी खेलाडीहरुले त्यसो गरेका छन् । त्यसले हामीलाई भने पीडा दिएको छ । एक खेलाडीले सकेसम्म अन्तिम सम्म ठूलो इनिङ खेल्न आवश्यक छ । हाम्रो प्रतियोगिता कस्तो भयो सबैले चर्चा गरेका छन्,’ रोहितले निराश हुँदै भने ।

‘हामीले टोलीमा धेरै परिवर्तन नगर्ने प्रयास गर्यौ । संभव भएसम्म राम्रो संयोजनमा खेल्न प्रयास गरेका छौं । तर तपाईंहरु हार्नुहुन्छ भने धेरै चर्चा हुन्छ । मैले खेलाडीहरुलाई आफूलाई प्रमाणित गर्ने पर्याप्त मौका दिन चाहन्छु । यस सिजन हामीले चाहेको जस्तो गएको छैन । तर यस्तो हुन्छ, उनले भने ।’

मुम्बई आइपिएलमा सर्वाधिक उपाधि जित्ने टोली हो । मुम्बईले २०१३, २०१५, २०१७, २०१९ र २०२० मा गरि पाँच उपाधि जितेको छ । मुम्बईपछि चेन्नईले ४ उपाधि जितेको छ । चेन्नई पनि यस सिजनमा ८ खेलमा २ मा जित र ६ मा हारका साथ नवौं स्थानमा रहँदै संघर्ष गरेको छ । आइपिएल इतिहासमा सुरुवाती आठ खेल लगातार हार्ने मुम्बई पहिलो टोली हो ।

मुम्बईले आफ्नो नवौं खेल शनिबार राजस्थान रोयल्ससँग खेल्नेछ । मुम्बईले बाँकी ६ खेलमा जित्दा पनि १२ अंकका साथ शीर्ष चारमा स्थान बनाउने सम्भावना भने देखिदैन । मेगा अक्सनको कारण नयाँ टिम निर्माण र अक्सनमा टिम सन्तुलनमा ध्यान नदिँदा मुम्बईले आफ्नो इतिहासकै खराब प्रदर्शन गरेको छ ।

यो पनि : मुम्बईले इतिहासकै खराब प्रदर्शन गर्नुको पाँच कारण

आइपिएलका महँगा तर फ्लप स्टार