एजेन्सी – ओपनर तथा कप्तान लोकेश राहुलको दोस्रो शतकमा लखनऊ सुपर जायन्ट्सले इन्डियन प्रिमियर लिग (आइपिएल) २०२२ मा मुम्बई इन्डियन्सलाई १ सय ६९ रनको प्रतिस्पर्धात्मक लक्ष्य दिएको छ ।

वानखडे स्टेडियम मुम्बईमा टस हारेर ब्याटिङको निम्तो पाएको लखनऊले २० ओभरमा ६ विकेट गुमाउँदै १ सय ६८ रन बनायो । लखनऊका कप्तान लोकेश राहुलले ६२ बलमा १२ चौका र ४ छक्कासहित सर्वाधिक १ सय ३ रनमा अविजित रहे । जारी आइपिएलमा राहुलको दोस्रो शतक हो ।

यसअघि राहुलले मुम्बईविरुद्ध ६० बलमा ९ चौका र ५ छक्कासहित १ सय ३ रनको अविजित शतकीय इनिङ खेलेका थिए । आइपिएलमा राहुलको यो चौथो शतक हो । ओपनर क्विन्टन डि कक १०, मनिष पाण्डे २२, मार्कस स्टोइनिस शून्य र क्रुनाल पान्ड्या १ रनम आउट भए । आयुष बदोनीले १४ रन बनाए ।

मुम्बईका काइरन पोलार्डले २ ओभरमा ८ रन खर्चेर २ विकेट लिए । राइली मेरिडीथले ४ ओभरमा ४० रन खर्चेर २ विकेट लिए । जस्प्रित बुमराह र ड्यानियल साम्सले १–१ विकेट लिए ।

मुम्बई ७ खेलमा ७ मा हारका साथ पुछारमा छ । मुम्बई पहिलो जितको खोजीमा छ । लखनऊ ७ खेलमा ४ मा जित र ३ मा हार सहित ८ अंकका साथ पाँचौं स्थानमा छ । लखनऊ मुम्बईलाई हराउँदै दोस्रो स्थानमा उक्लिन चाहन्छ ।