एजेन्सी – इन्डियन प्रिमियर लिग (आइपिएल) २०२२ को ३४ औं खेलमा आज दिल्ली क्यापिटल्स र राजस्थान रोयल्सबीच प्रतिस्पर्धा हुँदैछ । खेल नेपाली समय अनुसार साँझ ७ : ४५ मा वानखडे स्टेडियम मुम्बईमा सुरुहुनेछ ।

राजस्थान पाँचौं जितका साथ शीर्षस्थानमा उक्लिने सोचमा छ । सञ्जु स्यामसनको कप्तानीमा रहेको राजस्थान ६ खेलमा ४ मा जित र २ मा हार सहित ८ अंक जोड्दै अंक तालिकामा तेस्रो स्थानमा छ । आजको खेलमा विजयी हुँदा राजस्थानले शीर्षस्थानमा रहेको गुजरात टाइटन्सलाई पछि पार्नेछ ।

यता ऋषभ पन्तको कप्तानीमा रहेको दिल्ली ६ खेलमा ३ मा जित र ३ मा हारसहित छैटौं स्थानमा छ । दिल्ली चौथो जितका साथ अंक तालिकामा तेस्रो स्थानमा उक्लिने सोचमा छ । दिल्लीका डेविड वार्नर र राजस्थानका जस बटलर राम्रो लयमा छन् । डेविड वार्नरले पछिल्ला तीन खेलमा अर्धशतक प्रहार गरेका छन् ।

राजस्थानका ओपनर जस बटलरले यस सिजनमा २ शतक र २ अर्धशतक सहित कुल ३ सय ७५ रन बनाएका छन् । बटलरले कोलकाता नाइट राइडर्सविरुद्ध १ सय ३ र मुम्बईविरुद्ध १ सय रनको शतकीय इनिङ खेलेका थिए । वार्नर र बटलर दुबै आक्रामक ब्याटर हुन् । टोलीका प्रमुख ब्याटर हुन् । आजको खेलमा यी दुई खेलाडीको प्रदर्शन निकै महत्वपूर्ण हुनेछ ।

भारतीय चर्चित स्पिनर जोडी कुलदीप यादव र युजभेन्द्र चाहल पनि एक अर्काविरुद्ध भिड्ने छन् । चाहल राजस्थान र कुलदीप दिल्लीबाट खेलेका छन् । दुबैको प्रदर्शन उत्कृष्ट छ । चाहलले १७ र कुलदीपले १३ विकेटका साथ शीर्ष र दोस्रो स्थानमा छन् । चाहल दिल्लीको र कुलदीप राजस्थानको मध्यक्रम धरासय बनाउन खोज्नेछन् । चहलले पछिल्लो खेलमा कोलकातासँग ह्याट्रिक सहित पाँच विकेट लिएका थिए ।

राजस्थानका सन्जु र दिल्लीका ऋषभ पन्त दुबै आक्रामक ब्याटर हुन् । राजस्थानका शिम्रन हेटमायरले राम्रो प्रदर्शन गरेका छन् । दिल्लीका रोभम्यान पावेलले संघर्ष गरेका छन् । उनीबाट दिल्ली विष्फोटक ब्याटिङ चाहन्छ । राजस्थानमा ट्रेन्ट बोल्ट, प्रसिद्ध कृष्ण र ओबेद म्याककोय तीव्र गतिका हतियार हुन् । दिल्लीमा शार्दुल ठाकुर, खलिल अहमद र मुश्ताफिजुर रहमान छन् ।

दिल्लीले पछिल्लो खेलमा पन्जाबलाई ९ विकेट र राजस्थानले कोलकातालाई ७ रनले हराएको थियो । पछिल्लो खेलमा जितको कारण दुबैको मनोबल उच्च छ । दिल्ली र राजस्थानबीचको प्रतिस्पर्धा कडा हुने अनुमान गरिएको छ ।

हेड टु हेड :

आइपिएलमा दिल्ली र राजस्थानबीच कुल २४ खेल भएका छन् । दुबै टोलीले १२–१२ मा जित हात पारेका छन् । पछिल्ला पाँच खेल मध्य ४ मा दिल्ली विजयी भएको छ ।

अंक तालिका

गुजरात ६ खेलमा ५ मा जित र १ मा हार सहित १० अंकका साथ शीर्षस्थानमा छ । बेंगलोर ७ खेलमा ५ मा जित र २ मा हार सहित १० अंकका साथ दोस्रो स्थानमा छ ।

राजस्थान रोयल्स ६ खेलमा ४ मा जित र २ मा हार सहित ८ अंकका साथ तेस्रो स्थानमा छ । लखनऊ ७ खेलमा ४ मा जित र ३ मा हार सहित चौथो स्थानमा छ । हैदराबाद पनि ६ खेलमा ४ मा जित र २ मा हार सहित ८ अंक भएपनि नेटरनरेटको कारण पाँचौं स्थानमा छ । दिल्ली ६ खेलमा ३ मा जित र ३ मा हार सहित छैटौं स्थानमा उक्लिएको छ ।

कोलकाता नाइट राइडर्स ७ खेलमा ३ मा जित र ४ मा हार सहित सातैं स्थानमा छ । पन्जाब ७ खेलमा ३ मा जित र ४ मा हार सहित आठौं स्थानमा छ । चेन्नई ७ खेलमा २ मा जित र ५ मा हार सहित नवौं स्थानमा छ । मुम्बई ७ खेलमा जित बिहीन हुँदै पुछारमा छ ।