एजेन्सी – विकेटकिपर महेन्द्रसिंह धोनीको उत्कृष्ट अन्त्यमा चेन्नई सुपर किंग्सले इन्डियन प्रिमियर लिग (आइपिएल) २०२२ मा मुम्बई इन्डियन्सलाई ३ विकेटले पराजित गरेको छ । पाँच पटकको च्याम्पियन मुम्बई इन्डियन्सले भने लगातार सातौं हार बेहोरेको छ ।

१ सय ५६ रनको विजयी लक्ष्य पछ्याएको चेन्नईले २० ओभरमा ७ विकेट गुमाउँदै पूरा गर्यो । चेन्नईका लागि अम्बाती रायुडूले ३५ बलमा २ चौका र ३ छक्कासहित सर्वाधिक ४० रन बनाए । महेन्द्रसिंह धोनी १३ बलमा ३ चौका र १ छक्कासहित २८ रनमा अविजित रहे ।

अन्तिम ६ बलमा चेन्नईलाई १७ रन चाहिँएको थियो । धोनीले अन्तिम बलमा चौका प्रहार गर्दै जित पक्का गराए । पहिलो बलमै जयदेव उनादकटले ड्वेन प्रिटोरियसलाई २२ रनमा एलबीडब्लु आउट गरे । अर्को बलमा ब्राभोले महेन्द्रसिंह धोनीलाई स्ट्राइक दिए । त्यसपछि धोनीले आफ्नो जादुदेखाए । धोनीले तेस्रो बलमा छक्का प्रहार गरेपछि बाँकी ३ बलमा १० रन जितको लागि चाहिँएको थियो ।

धोनीले चौथो बलमा चौका प्रहार गरे । धोनीले पाँचौं बलमा दुई रन बटुले । अन्तिम बलमा चार रन चाहिँएको अवस्थामा धोनीले चौका प्रहार गर्दै रोमान्चक जित दिलाए । त्यसअघि चेन्नईलाई अन्तिम १८ बलमा जितको लागि ४२ रन आवश्यक परेको थियो ।

चेन्नईका ओपनर ऋतुराज गायकवाड गोल्डेन डक, मिचेल सान्टनार ११, शिवम दुबे १३ र रविन्द्र जडेजा ६ रनमा आउट भए । ओपनर रोबिन उथप्पा भने २५ बलमा २ चौका र २ छक्कासहित ३० रनमा आउट भए । मुम्बईका तीव्र गतिका बलर ड्यानियल साम्सले ४ ओभरमा ३० रन खर्चेर ४ विकेट लिए । जयदेव उनादकटले २ र राइली मेरिडीथले १ विकेट लिए ।

त्यसअघि डिवाई पाटिल स्पोर्ट्स एकेडेमी टस हारेर ब्याटिङको निम्तो पाएको घरेलु टोली मुम्बईले निर्धारित २० ओभरमा ७ विकेट गुमाउँदै १ सय ५५ रन बनाएको थियो । मुम्बईका मध्यक्रमका ब्याटर तिलक बर्माले ४३ बलमा ३ चौका र २ छक्कासहित सर्वाधिक ५१ रनको अविजित इनिङ खेले ।

पहिलो ओभरमै तीव्र गतिका बलर मुकेश चौधरीले दुबै ओपनर रोहित शर्मा र ईशान किशनलाई डक आउट पेभेलिएन फर्काएका थिए । डेवाल्ड ब्रेभिस ४ रनमै मुकेशको बलमा आउट भए । सूर्य कुमार यादव २१ बलमा ३ चौका र १ छक्कासहित ३२, हृतिक शोकिन २५ र काइरन पोलार्ड १५ रनमा आउट भए ।

जयदेव उनादकट ९ बलमा १ चौका र १ छक्कासहित १९ रनमा अविजित रहे । चेन्नईका तीव्र गतिका बलर मुकेश चौधरीले ३ ओभरमा १९ रन खर्चेर ३ विकेट लिए । ड्वेन ब्राभोले ४ ओभरमा ३६ रन खर्चेर २ विकेट लिए ।

अंक तालिका

गुजरात ६ खेलमा ५ मा जित र १ मा हार सहित १० अंकका साथ शीर्षस्थानमा छ । बेंगलोर ७ खेलमा ५ मा जित र २ मा हार सहित १० अंकका साथ दोस्रो स्थानमा छ ।

राजस्थान रोयल्स ६ खेलमा ४ मा जित र २ मा हार सहित ८ अंकका साथ तेस्रो स्थानमा छ । लखनऊ ७ खेलमा ४ मा जित र ३ मा हार सहित चौथो स्थानमा छ । हैदराबाद पनि ६ खेलमा ४ मा जित र २ मा हार सहित ८ अंक भएपनि नेटरनरेटको कारण पाँचौं स्थानमा छ । दिल्ली ६ खेलमा ३ मा जित र ३ मा हार सहित छैटौं स्थानमा उक्लिएको छ ।

कोलकाता नाइट राइडर्स ७ खेलमा ३ मा जित र ४ मा हार सहित सातैं स्थानमा छ । पन्जाब ७ खेलमा ३ मा जित र ४ मा हार सहित आठौं स्थानमा छ । चेन्नई ७ खेलमा २ मा जित र ५ मा हार सहित नवौं स्थानमा छ । मुम्बई ७ खेलमा जित बिहीन हुँदै पुछारमा छ ।