एजेन्सी – इन्डियन प्रिमियर लिग (आइपिएल) २०२२ को ३१ औं खेलमा आज लखनऊ सुपर जायन्ट्स र रोयल च्यालेन्जर्स बेंगलोरबीच प्रतिस्पर्धा हुँदैछ । खेल नेपाली समय अनुसार साँझ ७ : ४५ मा डिवाई पाटिल स्पोर्ट्स एकेडेमी मुम्बईमा सुरु हुनेछ ।

बेंगलोर ६ खेलमा ४ मा जित र २ मा हार सहित ८ अंकका साथ चौथो स्थानमा छ । लखनऊ ६ खेलमा ४ मा जित र २ मा हार सहित ८ अंकका साथ तेस्रो स्थानमा छ । गुजरात टाइटन्स ६ खेलमा ५ मा जित र १ मा हार सहित १० अंकका साथ शीर्षस्थानमा छ । आजको खेलमा विजयी हुने टोली १० अंकका साथ शीर्षस्थानमा उक्लिने सम्भावना उच्च छ । त्यसको लागि नेटरनरेटमा पनि ध्यान दिनुपर्ने हुन्छ ।

बेंगलोरले यस सिजनमा राम्रो प्रदर्शन गरेको छ । विकेटकीपर दिनेश कार्तिकले तल्लोक्रममा यस सिजनमा उत्कृष्ट प्रदर्शन गर्दै आएका छन् । पछिल्लो खेलमा पनि उनले दिल्ली क्यापिटल्सविरुद्ध ३४ बलमा ५ चौका र ५ छक्कासहित ६६ रनको उत्कृष्ट इनिङ खेलेका थिए । उनको लय रोक्न लखनऊलाई प्रमुख चुनौती हुनेछ ।

फाफ डु प्लेसिस, विराट कोहली र ग्लेन म्याक्सवेलबाट बेंगलोर ब्याटिङमा उत्कृष्ट प्रदर्शन चाहन्छ । तीव्र गतिका बलर जोश हेजलवुड र स्पिनर वानिन्दु हसरंगा प्रमुख हतियार हुन् । यी दुई बलरको प्रदर्शन बेंगलोरको बलिङ आक्रामणमा धेरै प्रभाव पार्नेछ । डेथ ओभरमा हर्षल पटेलले लगातार उच्च प्रदर्शन गर्दै आएका छन् ।

यता लखनऊका कप्तान लोकेश राहुल लयमा फर्किएका छन् । राहुलले मुम्बई इन्डियन्सविरुद्ध १ सय ३ रनको शतकीय इनिङ खेलेका थिए । राहुल र क्विन्टन डि कक प्रमुख ब्याटर हुन् । लखनऊमा अलराउन्डरको बाहुल्यता छ । मनिष पाण्डे, मार्कस स्टोइनिस, दीपक हुडा र जेसन होल्डर मध्यक्रमका ब्याटर हुन् ।

युवा ब्याटर आयुष बदोनीले राम्रो प्रभाव छाड्दै आएका छन् । बदोनी बेंगलोरलाई घातक बन्नसक्छन् । दुश्मन्था चामिरा र आवेश खान प्रमुख तीव्र गतिका बलर हुन् । यी दुई बलरलाई होल्डर र स्टोइनिसले साथ दिनेछन् । स्पिनरमा रवि विश्रोई हुनेछन् ।