एजेन्सी – राहुल त्रिपाठी र एडेन माक्ररमको उत्कृष्ट ब्याटिङमा सनराइजर्स हैदराबादले इन्डियन प्रिमियर लिग (आइपिएल) २०२२ को २५ औं खेलमा कोलकाता नाइट राइडर्समाथि ७ विकेटको सानदार जित हात पारेको छ ।

यो जितसँगै केन विलियम्सनको कप्तानीमा रहेको हैदराबाद ५ खेलमा ३ मा जित र २ मा हार सहित सातौं औं स्थानमा उक्लिएको छ ।
जितको लागि १ सय ७६ रनको विजयी लक्ष्य पछ्याएको हैदराबादले १७.५ ओभरमा ३ विकेट गुमाउँदै पूरा गर्यो । हैदराबादलाई लगातार तेस्रो जित दिलाउन राहुल त्रिपाठीले ३७ बलमा ४ चौका र ६ छक्कासहित ७१ रनको सानदार इनिङ खेले ।

एडेन माक्ररम ३६ बलमा ६ चौका र ४ छक्कासहित ६८ रनमा अविजित रहे । माक्ररमले प्याट कमिन्सलाई लगातार दुई छक्का प्रहार गर्दै खेल सकाएका थिए । हैदराबादको सुरुवात भने राम्रो थिएन । तीव्र गतिका बलर प्याट कमिन्सले ओपनर अभिषेक शर्मालाई ३ रनमा बोल्ड आउट गरे । आन्द्रे रसेलको बलमा कप्तान केन विलियम्सन १७ रनमा बोल्ड आउट हुँदा ५.२ ओभरमा ३९–२ को अवस्थामा पुगेको थियो ।

तेस्रो विकेटका लागि एडेन माक्ररम र राहुल त्रिपाठीले ९४ रनको साझेदारी गर्दै साानदार जितको आधार तय गरे । त्रिपाठी रसेलको बलमा वेंकटेश ऐरबाट लङअनमा क्याच भए । निकोलस पुरन रनमा अविजित रहे । कोलकाताका आन्द्रे रसेलले २ विकेट लिए ।

त्यसअघि ब्रेबोन स्टेडियम मुम्बईमा टस हारेर ब्याटिङको निम्तो पाएको कोलकाताले निर्धारित २० ओभरमा ८ विकेट गुमाउँदै १ सय ७५ रन बनायो । कोलकाताका नितिश रानाले ३६ बलमा ६ चौका र २ छक्कासहित सर्वाधिक ५४ रन बनाए ।

तल्लोक्रममा आन्द्रे रसेलले २५ बलमा ४ चौका र ४ छक्कासहित ४९ रनमा अविजित रहँदै आक्रामक इनिङ खेले । रसेलले अन्तिम तीन बलमा जगदिश सुचिथलाई दुई छक्का र एक चौका प्रहार गरेका थिए ।

ओपनर वेंकटेश ऐरलाई टि नटराजनले ६ रनमा बोल्ड आउट गरे । कोलकाताको लागि पहिलो खेल खेलेका ओपनर आरोन फिन्च मार्को ज्यानसनको बलमा ७ रनमा निकोलस पुरनबाट क्याच भए ।

श्रेयस ऐर २५ बलमा ३ चौकासहित २८ रन बनाए । ऐर उमरन मलिकको बलमा बोल्ड भए । सुनिल नारायण ६ र शेल्डन ज्याक्सन ७ रनमा आउट भए । हैदराबादका उमरन मलिकले ४ ओभरमा २७ रन खर्चेर २ विकेट लिए । टि नटराजनले ४ ओभरमा ३७ रन खर्चेर ३ विकेट लिए । मार्को ज्यानसन, भुवनेश्वर कुमार र जगदीश सुचिथले १-१ विकेट लिए ।

कोलकाताले अव सोमबार राजस्थान रोयल्ससँग खेल्नेछ । हैदराबादले आइतबार पन्जाब किंग्ससँग खेल्नेछ । शनिबार दुई खेल हुनेछन् । पहिलो खेलमा मुम्बई इन्डियन्स र लखनऊ सुपर जायन्ट्सबीच दिउँसो ३ : ४५ मा हुनेछ । मुम्बई लगातार पाँच खेलमा पराजित भएको छ । मुम्बई पहिलो जितको खोजीमा हुनेछ । दोस्रो खेलमा दिल्ली र बेंगलोरबीच साँझ ७ः ४५ मा सुरुहुनेछ । यी दुई टोली शीर्ष स्थानमा उक्लिने दौडमा हुनेछन् ।

अंक तालिका

गुजरात ५ खेलमा ४ मा जित र १ मा हार सहित शीर्षस्थानमा छ । राजस्थान रोयल्स ५ खेलमा ३ मा जित र २ मा हार सहित ६ अंकका साथ दोस्रो स्थानमा छ । पन्जाब ५ खेलमा ३ मा जित र २ मा हार सहित तेस्रो स्थानमा छ । कोलकाता नाइट राइडर्स ६ खेलमा ३ मा जित र ३ मा हार सहित चौथो स्थानमा पुगेको छ ।

लखनऊ ५ खेलमा ३ मा जित र २ मा हार सहित पाँचौं स्थानमा छ । बेंगलोर ५ खेलमा ३ मा जित र २ मा हारसहित छैटौं स्थानमा छ । हैदराबाद ५ खेलमा ३ मा जित र २ मा हार सहित सातौं स्थानमा छ । दिल्ली ४ खेलमा २ मा जित र २ मा हार सहित आठौं स्थानमा छ । चेन्नई ५ खेलमा १ मा जित र ४ मा हार सहित नवौं स्थानमा छ । मुम्बई ५ खेलमा जित बिहीन हुँदै पुछारमा छ ।