काठमाडौं (हाम्रो खेलकुद) – एसिसी महिला एसिया कपमा खराब प्रदर्शन गर्दै फर्केको दुई दिनपछि बुधबार नेपाली टोलीले अघिल्लो सफलताका लागि सरकारबाट नगद पुरस्कार पाएको छ । युवा तथा खेलकुद मन्त्रालयमा आयोजित कार्यक्रममा दुई महिनाअघि हङकङमा सम्पन्न विश्व कप टि ट्वान्टी एसिया छनोट क्रिकेट प्रतियोगितामा दोश्रो हुने टोलीलाई नगद प्रदान गरियो । भएको नेपाली राष्ट्रिय महिला क्रिकेट टोलीलाई बुधबार नगदसहित सम्मान गरेको छ । प्रतियोगिता हङकङमा अक्टोबर ९ देखि १५ तारिखसम्म भएको थियो । टोलीका १४ खेलाडी, १ प्रशिक्षक र १ फिजियोसहित १६ सदस्यीय टोलीलाई पूर्वघोषित पुरस्कार जनही २५ हजार र सम्मान पत्र प्रदान गरिएको थियो । टोलीमा कप्तान रुविना क्षेत्री, सीता राना मगर (उपकप्तान), नेरी थापा, निरा राजोपाध्याय, करुणा भण्डारी, सरिता मगर, इन्दु बर्मा, काजोल श्रेष्ठ, सबनम राई, रोशनी बोहरा, सरस्वती चौधरी, रश्मी शर्मा, निर्मला शाही र ज्योति पाण्डे थिए । टोलीको प्रशिक्षक राजु बस्न्यात र फिजियो मनु लु थिए ।

सिंहदरबारस्थित मन्त्रालयमा मा आयोजित कार्यक्रममा खेलकुद मन्त्री दलजीत विके श्रीपाली र खेलकुद मन्त्रालयका सह–सचिव चूडामणि पौडेलले टोलीका सदस्यलाई सम्मान गरे । कार्यक्रमलाई सम्बोधन गर्दै मन्त्री श्रीपालीले एसिया कपको प्रदर्शनलाई स्मरण गर्दै हर्दा निराश हुने र जितमा मातिने परिपाटीको अन्त्य हुने पर्नेमा जोडी दिए । उनले भने, ‘हारबाट पाठ सिकेर जितका लागि सोच्नु पर्छ ।’
खेलाडीले अभाव र अप्ठेरोबीच खेल्नु परेकोले राम्रो नतिजा आउन नसकेको उल्लेख गर्दै मन्त्री श्रीपालीले खेलाडीलाई कीर्तिपुरको मैदानमा मात्र सीमित नगर्नेतर्फ आफ्नो ध्यानकर्षण भएको बताए । उनले सातौं राष्ट्रिय खेलकुद अहिलेको एक मात्र अर्जुनदृष्टि भएकोले सरोकारवाला सबैलाई यसैमा केन्द्रित हुन आग्रह गरे ।
सह–सचिव पौडेलले एसिया कपको कमी कमजोरीबाट पाठ सिकेरले आगामी अन्तर्राष्ट्रिय प्रतियोगितालाई उत्साहजनक बनाउन खेलाडीले ध्यान दिनु पर्ने बताए । उनले आईसीसीले दिएको समय भित्रै काम सम्पन्न गरी नेपाली क्रिकेटलाई संस्थागत ढंगबाट अगाडि बढाउन प्रतिबद्ध रहेको बताए ।
कप्तान रुविनाले राम्रो नतिजा हासिल गर्न धेरै भन्दा धेरै अभ्यास खेलको खाँचो रहेको बताइन् । प्रशिक्षक बस्न्यातले महिला क्रिकेटलाई माथि उकास्न दीर्घकालीन योजना आवश्यक रहेको जनाउँदै अभ्यास खेलका साथै घरेलु प्रतियोगितामा पनि ध्यान दिनु पर्नेमा जोड दिए ।