एजेन्सी – ओपनर डेविड वार्नर र पृथ्वी शाको अर्धशतकमा दिल्ली क्यापिटल्सले इन्डियन प्रिमियर लिग (आइपिएल) २०२२ को १९ औं खेलमा कोलकाता नाइट राइडर्सलाई २ सय १६ रनको विशाल लक्ष्य दिएको छ ।

ब्रेबोन स्टेडियम मुम्बईमा टस हारेर ब्याटिङको निम्तो पाएको दिल्लीले निर्धारित २० ओभरमा ५ विकेट गुमाउँदै २ सय १५ रन बनायो । दिल्लीका डेविड वार्नरले ४५ बलमा ६ चौका र २ छक्कासहित सर्वाधिक ६१ रनको योगदान दिए ।

अर्का ओपनर पृथ्वी शाले २९ बलमा ७ चौका र २ छक्कासहित ५१ रनको आक्रामक सुरुवात दिलाएका थिए । शा स्पिनर बरुण चक्रवर्तीको बलमा बोल्ड आउट भए । पहिलो विकेटका लागि शा र वार्नरले ८.४ ओभरमा ९३ रनको साझेदारी गर्दै आक्रामक उत्कृष्ट सुरुवात दिलाएका थिए । वार्नर उमेद यादवको बलमा डिप मिडविकेटमा अजिक्या रहाणेबाट क्याच भए ।

१३ ओभरमा दिल्ली १४८–२ को अवस्थामा थियो । तर बाँकी ३० बलमा ३ विकेट गुमाउँदै मात्र २८ रनमात्र जोडेको थियो । कप्तान ऋषभ पन्त १४ बलमा २ चौका र २ छक्कासहित २७ रनमा क्याच आउट भए । ललित यादव १ र रोभम्यान पावेल ८ रनमा आउट भए ।

तल्लोक्रमका शार्दुल ठाकुरले ११ बलमा १ चौका र ३ छक्कासहित २९ रनको अविजित इनिङ खेले । अक्षर पटेल १४ बलमा २ चौका र १ छक्कासहित २२ रनमा अविजित रहे ।

कोलकाताका स्पिनर सुनिल नारायणले ४ ओभरमा २१ रन खर्चेर २ विकेट लिए । बरुण चक्रवर्ती र उमेद यादवको नाममा १–१ विकेट रह्यो ।