काठमाडौं (हाम्रो खेलकुद) – स्पिनर सचिन कुमार सिंहले ६ विकेट लिएपछि शुक्रबार प्रो क्लब च्याम्पियनसिपमा नेपाल पुलिस क्लब पुश स्पोर्ट्स दिल्लीसँग १ रनले पराजित भएको छ ।

सचिन भारतको सर्वाधिक ठूलो घरेलु प्रतियोगिता रणजी ट्रफी अनुभवी खेलाडी हुन् । बिहारबाट यसै सिजनमा उनले रणजीमा डेब्यू गरेका थिए । २४ वर्षीय सचिनले बिहारबाट २ प्रथम श्रेणीको खेलेका छन् । रणजी ट्रफी भारतीय प्रथम श्रेणी मान्यता सर्वाधिक ठूलो घरेलु प्रतियोगिता हो । त्यहिँ प्रतियोगिता आधारमा भारतको टेस्टको लागि सिनियर टोली, ए, बी र सी टोली निर्माण गरिन्छ ।

१ सय ३४ रनको विजयी लक्ष्य पछ्याएको पुलिसले निर्धारित २० ओभरमा ९ विकेट गुमाउँदै १ सय ३२ रन बनायो । दिल्लीका सचिन सिंहले ४ ओभरमा १ मेडनसहित २० रन खर्चेर ६ विकेट लिए ।

पुलिसलाई जितको लागि अन्तिम ६ बलमा १९ रन चाहिँएको थियो । ईशान पाण्डेलाई गुलशन झाले पहिलो बलमा चौका, दोस्रो र तेस्रो बलमा लगातार छक्का प्रहार गरेपछि जितको लागि ३ बलमा ३ रन चाहिँएको थियो ।

चौथो बलमा गुलशन क्याच आउट भए । पाँचौं बल ईशानले सागर ढकाललाई डट राख्दा अन्तिम बलमा एक रन दिँदै दिल्लीलाई १ रनको जित दिलाए । नेपाली क्रिकेट टोलीबाट खेलि सकेका ईशानले दिल्लीको क्लबबाट खेलेका हुन् । सचिनले २ प्रथम श्रेणीको खेलमा ३० रन बनाउनुको साथै ६ विकेट लिएका छन् ।

उनले ६ लिष्ट ए र ५ टि२० क्रिकेट खेलेका छन् । उनले लिष्ट ए मा १ सय १३ रन र ५ विकेट लिएका छन् । टि२० क्रिकेटमा ५ विकेट लिएका छन् । ब्याटिङमा भने उनी ६ बल खेलेर मन्जित श्रेष्ठको बलमा पवन सरार्फबाट क्याच भएका थिए । सचिनले आगमी खेल खेल्ने सम्भावना भने निकै कम छ । भारतको नेशनल क्रिकेट एकेडेमी (एनसिए) ले बोलाएपछि उनी आजनै त्यसतर्फ फर्केको बुझिएको छ ।

सचिनले दीलिप नाथ, अर्जुन साउद, प्रेम तामाङ, मञ्जित श्रेष्ठ, रोशन बुधल र पवन सरार्फलाई आउट गरेका थिए । सचिनले बिसिसिआई यू–२३ टोलीबाट पनि खेलि सकेका छन् । पुलिसका गुलशन झाले २४ बलमा ४ चौका र २ छक्कासहित सर्वाधिक ३६ रन बनाए ।

त्यसअघि सिद्धार्थ रंगशाला भैरहवामा टस जितेर पहिला ब्याटिङ थालेको दिल्लीले निर्धारित २० ओभरमा ८ विकेट गुमाउँदै १ सय ३३ रन बनाएको थियो । दिल्लीका ओपनर आदित्य जैनले ३५ बलमा ४ चौका र २ छक्कासहित सर्वाधिक ३८ रन बनाए । पुलिसका कप्तान मञ्जित श्रेष्ठले ४ ओभरमा १ मेडनसहित १० रन खर्चेर ४ विकेट लिए ।