काठमाडौं (हाम्रो खेलकुद) – घरेलु टोली रुपन्देही ११ ले प्रो क्लब च्याम्पियनसिपको उद्धघाटन खेलमा मलेसिया ११ माथि ६ विकेटको सानदार जित हात पारेको छ । नेपाल र पपुवा न्युगिनीसँग त्रिकोणात्मक टि२० आई सिरिज खेलेर भैरहवा पुगेको मलेसिया पहिलो खेलमै घरेलु टोली रुपन्देहीसँग स्तब्ध हुन पुगेको हो ।

१ सय ३२ रनको विजयी लक्ष्य रुपन्देहीले १९.२ ओभरमा ४ विकेट गुमाउँदै पूरा गर्यो । रुपन्देहीको जितमा अलराउन्डर बशिर अहमद १८ बलमा ४ चौका सहित २७ रनमा अविजित रहे । ओपनर प्रज्वल थापाले ३२ बलमा ५ चौका र १ छक्कासहित सर्वाधिक ३८ रनको योगदान दिए । सन्दीप रजाली १४ बलमा २ चौका र २ छक्कासहित २४ रनमा अविजित रहे ।

रुपन्देहीलाई ओपनर देव खनाल र प्रज्वल थापाले ९.३ ओभरमा ५२ रनको साझेदारी गर्दै राम्रो सुरुवात दिलाए । नेपाली टोलीबाट अघिल्लो साता पपुवा न्युगिनीविरुद्ध डेब्यू गरेका देव खनालले ३४ बलमा २ चौकासहित २२ रन जोडे । सुशान्त थापा ६ र तुल बहादुर थापा ७ रनमा आउट भए । मलेसियाका विरनदीपसिंहले ४ ओभरमा १८ रन खर्चेर २ विकेट लिए । मोहम्मद आमिर सैद अजिज १ रनमा आउट भए ।

त्यसअघि सिद्धार्थ रंगशाला भैरहवामा टस जितेर पहिला ब्याटिङ थालेको मलेसिया १९.५ ओभरमा १ सय ३१ रनमा अल आउट भएको थियो । मलेसियाका ओपनर विरनदीप सिंहले ६३ बलमा ७ चौका र १ छक्कासहित सर्वाधिक ६६ रनको योगदान दिए । सैद अजिजले २१ बलमा ४ चौका सहित २५ रन जोडे ।

ओपनर जुबैदी जुल्किफ्लिी र कप्तान अहमद फैज १–१ रनमा आउट भएका थिए । जुबैदी स्पिनर अनिल खरेल र फैज कप्तान कृष्ण कार्कीको बलमा बोल्ड भए । बायाँ हाते स्पिनर बशिर अहमदले एनुल हफिज र सैद अजिजलाई आउट गरे । दुर्गेश गुप्ताले मोहम्मद आमिरलाई १ रनमा बोल्ड आउट गरे ।

तल्लोक्रमका शार्विन मुनीआन्दीले १५ बलमा ३ चौका र १ छक्कासहित २८ रन जोडे । मलेसिया ८ खेलाडीले दोहोरो अंकमा रन बनाउन सकेनन् । रुपन्देहीका बशिर अहमदले ४ ओभरमा १७ रन खर्चेर २ विकेट लिए । कप्तान कृष्ण कार्कीले ३.५ ओभरमा १५ रन खर्चेर ३ विकेट लिए । अनिल खरेल, दुर्गेश गुप्ता र विक्रम भुषालले १–१ विकेट लिए ।

यसै साता नेपाल र पपुवा न्युगिनीसँग त्रिकोणात्मक टि२० आई सिरिज खेलेको मलेसिया टोली नै भैरहवा गएको हो । रुपन्देहीले अव आइतबार नेपाल पुलिस क्लबसँग खेल्नेछ । मलेसियाले सोमबार पुश स्पोर्ट्स दिल्लीसँग खेल्नेछ ।