काठमाडौं (हाम्रो खेलकुद – त्रिकोणात्मक टि२० आई सिरिज अन्तर्गत मलेसियासँग शनिबार भएको खेलमा घाइते भएका तीव्र गतिका बलर कमलसिंह ऐरीको सफल शल्यक्रिया भएको छ ।

आइतबार बिहान कलंकीमा रहेको नेपाल नेशनल अस्पतालमा चिकित्सक निरज केसी र निराजन सुवेदीको टोलीले शल्यक्रिया गरेका हुन् । शनिबार टियु मैदानमा नेपालले प्रस्तुत गरेको २ सय २४ रनको विजयी लक्ष्य पछ्याउने क्रममा कमल १८ औं ओभरमा घाइते भएका थिए । आदिल अन्सारीको बलमा मलेसिया ब्याटर एनुल हफिजले चोभार एण्डतर्फको लङअनमा प्रहार गरेको बल रोक्नेक्रममा क्रममा उनी घाइते भएका थिए ।

बल रोक्न डाइभ हान्ने क्रममा घाँटी मुनि रहने बायाँ भागको ब्यूटी बोनमा चोट लागेको थियो । नेपाली क्रिकेट टोलीका फिजियो विक्रम न्यौपानेका अनुसार उक्त हड्डी बिचबाट भाँचिएको हुँदा शल्यक्रिया गर्नु परेको हो । शल्यक्रियापछि हड्डी ठिक हुन कम्तिमा ६ हप्ता जति समय लाग्ने बताइएको छ । युवा स्टार कमलले पछिल्लो समय नेपाली टोलीबाट राम्रो प्रदर्शन गर्दै आएका छन् ।

उनलाई नेपालले त्रिकोणात्मक टि२० आई सिरिजमा भने शनिबार नै पहिलो अवसर दिएको थियो । यसअघिका उनी तीन खेलमा सामान्य चोटका कारण उनी बेन्चमा थिए । सोमपाल कामीलाई विश्राम दिँदै नेपालले उनलाई आज मौका दिएको थियो । तर दुर्भाग्य चोट बोक्न पुगे । कमलले चोट बोक्नु अघि सुरुवातमै दुई प्रमुख विकेट लिएका थिए ।

पहिलो ओभरको अन्तिम बलमै मलेसिया ओपनर जुबैदी जुल्किफ्लीलाई शून्यमा कुशल भुर्तेलबाट क्याच गराएका थिए । आक्रामक सुरुवात गरेका विरनदीप सिंहलाई छैटौं ओभरको चौथो बलमा स्क्वायर लेगमा आसिफ शेखबाट ४७ रनमा उत्कृष्ट क्याच आउट गराएका थिए ।

कमलले नेपालबाट ३ ओडिआई र १० टि२० आई खेल खेलेका छन् । कमलले ओडिआईमा २०२० मा आइसिसी विश्वकप लिग २ अन्तर्गत ओमानविरुद्ध टियु मैदानमा डेब्यू दिएको थियो । टि२० आईमा गतवर्ष मलेसियाविरुद्ध टियुमै डेब्यू गरेका थिए ।

नेपाललाई दुई महिना अघि आइसिसी टि२० विश्वकप छनोट ए मा अपराजित रहँदै सेमिफाइनल सम्म पुर्याउन कमलले उत्कृष्ट प्रदर्शन गरेका थिए । कमलले घरेलु क्रिकेट भने नेपाल एपिएफ क्लबबाट खेल्ने गर्दछन् । कमल तीव्र गतिसँगै तल्लोक्रममा आक्रामक ब्याटिङको क्षमता राख्छन् ।