काठमाडौं (हाम्रो खेलकुद) – मध्यक्रमका ब्याटर दीपेन्द्रसिंह ऐरीले टि२० आई क्रिकेटमा नेपालको लागि कीर्तिमानी सानदार शतक प्रहार गरेका छन् । दीपेन्द्रले घरेलु मैदान टियुमा त्रिकोणात्मक टि२० आई सिरिजमा मलेसियाविरुद्ध नेपाली टि२० क्रिकेट इतिहासकै उत्कृष्ट शतक प्रहार गरेका हुन् ।

टियु क्रिकेट मैदानमा टस हारेर पहिला ब्याटिङ थालेको नेपालले निर्धारित २० ओभरमा ५ विकेट गुमाउँदै २ सय २३ रन बनायो । दीपेन्द्रले ५७ बलमा १० चौका र ६ छक्कासहित १ सय १० रनको अविजित सानदार शतक प्रहार गरे । योसँगै दीपेन्द्र नेपालबाट टि२० आईमा एकै खेलमा सर्वाधिक रन बनाउने ब्याटर बनेका छन् ।

उनले पूर्व कप्तान ज्ञानेन्द्र मल्लको भुटानविरुद्ध १ सय ७ रनको कीर्तिमान तोडेका हुन् । ज्ञानेन्द्रले १३ औं दक्षिण एसियाली खेलकुद (साग) मा भुटानविरुद्ध ५५ बलमा ५ चौका र ९ छक्कासहित १ सय ७ रनको इनिङ खेलेका थिए । २०१९ मा पारस खड्काले सिंगापुरविरुद्ध ५२ बलमा ७ चौका र ९ छक्कासहित १ सय ६ रन बनाएका थिए । कुशल भुर्तेलले फिलिपिन्सविरुद्ध ६१ बलमा १३ चौका र १ छक्कासहित १ सय ४ रनमा अविजित थिए ।

दीपेन्द्र नेपालबाट ओडिआई र टि२० आई दुबैमा शतक प्रहार गर्ने दोस्रो खेलाडी हुन् । पारसले यी दुबैमा शतक प्रहार गर्ने पहिलो नेपाली खेलाडी हुन् । पारसले २०१९ मा युएईविरुद्ध तेस्रो ओडिआई खेलमा नेपालको लागि पहिलो शतक प्रहार गरेका थिए । उक्त खेलमा १ सय १५ रनको शतकीय इनिङ खेलेका थिए ।

दीपेन्द्रले ओडिआई पपुवा न्युगिनीसँग यसै साता दोस्रो खेलमा १ सय ५ रनको इनिङ खेलेका थिए । टि२० आईमा दीपेन्द्रले ५५ बलमा शतक पूरा गरेका थिए । दीपेन्द्रले अन्तिम ओभरको चौथो बलमा सैद अजिजलाई छक्का प्रहार गर्दै शतक पूरा गरेका थिए । पाँचौं बलमा पुन स्टेटमै छक्का प्रहार गर्दै कीर्तिमान रचेका थिए ।