काठमाडौं (हाम्रो खेलकुद) – कप्तान सन्दीप लामिछानेको उत्कृष्ट बलिङमा त्रिकोणात्मक टि२० आई सिरिज अन्तर्गत पहिलो खेलमा पपुवा न्युगिनी संकटमा परेको छ । १ सय ८४ रनको विजयी लक्ष्य पछ्याएको पपुवा न्युगिनीले १३ ओभरमा ७ विकेट गुमाउँदै १ सय रन बनाएको छ ।

करण केसीको दोस्रो ओभरको दोस्रो बलमा ओपनर टोनी उरा ठूलो सट खेल्ने धुनमा एज लागेर लोकेश बमबाट ५ रनमा आउट भए । त्यसअघिको बलमा मिडअफबाट दीपेन्द्रसिंह ऐरीले हानेको थ्रो बलले स्टम्पनै भाचिँएको थियो । अर्को ओभरमा सोमपाल कामीले लेगा सियाकालाई आरिफ शेखबाट २१ रनमा क्याच गराए । १० बल खेलेका उनले ३ चौका र १ छक्का प्रहार गरे ।

आक्रामक ब्याटिङ गरेका चाल्र्स अमिनी अभिनाश बोहराको छैटौं ओभरको तेस्रो बलमा २२ रनमा बोल्ड भए । उनले १० बलमा ३ चौका र १ छक्का प्रहार गरे । कप्तान सन्दीपको बलमा ठूलो सट खेलेका असाद भाला लङअनमा करण केसीबाट ७ रनमा क्याच भए । सन्दीपले सेसे बाउलाई ३० रनमा एलबीडब्लू आउट गर्दै नेपाललाई महत्वपूर्ण सफलता दिलाएका थिए ।

बाउले २४ बलमा ३ चौका र १ छक्का प्रहार गरे । अभिनाशको बलमा राइली हेकुरे थर्ड म्यानमा सोमपाल कामीबाट ३ रनमा क्याच आउट भए । जेसन किलालाई शून्यमा एलबीडब्लू आउट गरे ।

त्यसअघि टियु क्रिकेट मैदानमा टस हारेर ब्याटिङ थालेको नेपालले निर्धारित २० ओभरमा ९ विकेट गुमाउँदै १ सय ८३ रन बनायो । नेपालका ओपनर आसिफ शेखले ३५ बलमा ५ चौका र १ छक्कासहित सर्वाधिक ४३ रनको योगदान दिए । पपुवा न्युगिनीका एली नाओ, चाद सोपर र चाल्र्स अमिनीले २–२ विकेट लिए ।