एजेन्सी – इंग्ल्यान्डले अन्तिम खेलमा बंगलादेशमाथि सानदार जित निकाल्दै न्युजिल्यान्डमा जारी आइसिसी महिला एकदिवसिय विश्वकप २०२२ को सेमिफाइनलमा पुगेको छ । इंग्ल्यान्डले बंगलादेशलाई १ सय रनको फराकिलो अन्तरले पराजित गर्दै तेस्रो स्थानमा रहँदै समिफाइलमा स्थान पक्का गर्यो ।

२ सय ३५ रनको विजयी लक्ष्य पछ्याएको बंगलादेश ४८ ओभरमा १ सय ३४ रनमा अल आउट भयो । बंगलादेशकी लाता मोन्डलले ४५ बलमा ३ चौकासहित सर्वाधिक सर्वाधिक ३० रन बनाइन् । शमिमा सुल्तना र शरमिन अख्तरले २३–२३ रन बनाए । इंग्ल्यान्डकी सोफी एक्लेस्टोन र चार्लोट डीनले ३–३ विकेट लिए ।

त्यसअघि टस जितेर पहिला ब्याटिङ थालेको इंग्ल्यान्डले निर्धारित ५० ओभरमा ६ विकेट गुमाउँदै २ सय ३४ रन बनाएको थियो । इंग्ल्यान्डकी सोफिया डंकलीले ७२ बलमा ८ चौकासहित सर्वाधिक ६७ रन बनाइन् । नाट सेभर ४० र एमी जोन्स ३१ रनमा आउट भए । बंगलादेशकी सल्मा खातुनले सर्वाधिक दुई विकेट लिइन् ।

अष्ट्रेलिया ७ खेलमा अपराजित रहँदै १४ अंकका साथ शीर्ष स्थानमा रह्यो । दक्षिण अफ्रिका समान खेलमा ५ मा जित र १ मा हारसहित ११ अंकका साथ दोस्रो स्थानमा रह्यो । इंग्ल्यान्ड ७ खेलमा ४ मा जित र ३ मा हारसहित ८ अंकका साथ तेस्रो स्थानमा रह्यो । वेस्टइन्डिज ७ खेलमा ३ मा जित र ३ मा हारसहित चौथो स्थानमा रहँदै सेमिफाइनलमा पुगेको थियो । बंगलादेश भने ७ खेलमा १ मा जित र ६ मा हारसहित सातौं स्थानमा रहेर बाहिरियो ।

पहिलो सेमिफाइनलमा अष्ट्रेलिया र वेस्टइन्डिजबीच मार्च ३० मा प्रतिस्पर्धा हुनेछ । इंग्ल्यान्ड र दक्षिण अफ्रिकाबीच ३१ मार्चमा दोस्रो सेमिफाइनल हुनेछ । फाइनल अप्रिल ३ मा हुनेछ ।