एजेन्सी – पूर्व कप्तान महेन्द्रसिंह धोनीको परिपक्क अर्धशतकको सहयोगमा चेन्नई सुपर किंग्सले इन्डियन प्रिमियर लिग (आइपिएल) २०२२ को उद्धघाटन कोलकाता नाइट राइडर्सलाई १ सय ३२ रनको मध्यम लक्ष्य दिएको छ ।

वानखडे स्टेडियम मुम्बईमा टस हारेर ब्याटिङ थालेको चेन्नईले निर्धारित २० ओभरमा ५ विकेट गुमाउँदै १ सय ३१ रन बनायो । चेन्नईका पूर्व कप्तान महेन्द्रसिंह धोनी ३८ बलमा ७ चौका र १ छक्कासहित सर्वाधिक ५० रनमा अविजित रहे । चेन्नईमा पहिलो पटक धोनी कप्तान विनाको भूमिकाबाट खेलेका हुन् ।

२००८ देखि कप्तानी गर्दै आएका धोनीले यस सिजनमा रविन्द्र जडेजालाई हस्तान्तरण गरेका छन् । डेब्यू कप्तानी गरेका जडेजा २८ बलमा १ छक्कासहित २६ रनमा अविजित रहे । खराब प्रदर्शन गरेको चेन्नईलाई छैटौं विकेटका लागि धोनी र जडेजाले ७० रनको अविजित साझेदारी गरेका थिए । रोबिन उथप्पाले २१ बलमा २ चौका र २ छक्कासहित २८ रन बनाए ।

तीव्र गतिका बलर उमेश यादवले पहिलो ओभरको तेस्रो बलमा ओपनर ऋतुराज गायकवाडलाई शून्यमा नितिश राणाबाट क्याच गराए । युवा स्टार गायकवाड एज लागेर स्लिपमा क्याच हुन पुगे । यादवकै चौथो ओभरको पहिलो बलमा डेभन कन्वे कप्तान श्रेयस ऐरबाट ३ रनमा क्याच भए ।

स्पिनर बरुण चक्रवर्तीको बलमा उथप्पा विकेटकिपर शेल्डन ज्याकसनबाट स्टम्पिङ आउट भए । अम्बाती रायूडु १५ रनमा रन आउट हुँदा शिवम दुबे ३ रनमा क्याच आउट भए । कोलकाताका उमेश यादवले ४ ओभरमा २० रन खर्चेर २ विकेट लिए । बरुण चक्रवर्ती र आन्द्रे रसेलले १–१ विकेट लिए ।