एजेन्सी – इन्डियन प्रिमियर लिग (आइपिएल) २०२२ शनिबारदेखि भारतमा सुरु हुँदैछ । विश्वकै सर्वाधिक लोकप्रिय र धनराषि भएको आइपिएलमा यस सिजनदेखि १० टोलीले प्रतिस्पर्धा गर्नेछन् ।

दुई नयाँ टोली थपिएसँगै आइपिएल अव समूह चरणमा हुनेछ । १० टोलीलाई दुई समूहमा विभाजन गरिएको छ । समूह ए मा मुम्बई इन्डियन्स, कोलकाता नाइट राइडर्स, राजस्थान रोयल्स, दिल्ली क्यापिटल्स र लखनउ सुपर जायन्ट्स छन् । समूह बी मा चेन्नई सुपर किंग्स, सनराइजर्स हैदराबाद, रोयल च्यालेन्जर्स बेंगलोर, पन्जाब किंग्स र गुजरात टाइटन्स छन् ।

आफ्नो समूहमा रहेका टोलीसँग सबैले दुई दुई खेल खेल्नेछन् । अर्को समूहमा रहेका टोलीसँग १-१ खेल खेल्नेछन् । एक टोलीसँग दुई बढी खेल खेल्नुपर्ने हुन्छ । यसरी कुल १४ खेल खेलेपछि प्लेअफ समिकरण भने पहिला जसरी नै हुनेछ ।

अघिल्लो महिना मेगा अक्सनबाट सबै टोलीले आफ्नो पूर्ण टोली तयार पारेका छन् । अक्सनमा खेलाडीमा गरेको लगानीले आइपिएलमा नतिजा निर्धारण गर्ने गर्दछ । सबै टोलीले ९० करोड भारु भित्रमा आफ्नो टिम निर्माण गर्नुपर्ने हुन्छ । कुनै पनि टोली कस्तो छ भनेर अनुमान गर्न त्यस टोलीमा रहेका खेलाडीलाई हेर्नुपर्छ ।

खेलाडीको पछिल्लो समयको लय, क्षमता, युवा खेलाडीको सम्भावना, प्रशिक्षक, कप्तान, व्यवस्थापन लगायत धेरै कुराले फरक पार्छ । सबै टोलीमा रहेका खेलाडीलाई हेर्दा आइपिएल २०२२ मा उपाधि जित्न सक्ने पाँच बलिया टोली यस प्रकार छन् ।

५. दिल्ली क्यापिटल्स

दिल्ली क्यापिटल्सले पछिल्लो समय लगातार राम्रो प्रदर्शन गर्दै आएको छ । पहिलो पटक उपाधि जित्ने सोचमा रहेको दिल्लीले अक्सनमा वेस्टइन्डिजका आक्रामक ब्याटर रोभम्यान पावेल, अष्ट्रेलिया डेविड वार्नर, मिचेल मार्श र बंगलादेशका मुस्ताफिजुर रहमान जस्ता म्याच विनर विश्व स्टार खेलाडीलाई किनेपछि मजबुत बनेको छ ।

दिल्लीको ओपनिङ शा र वार्नरले गर्नेछन् । दुबै आक्रामक ब्याटिङका साथ ठूलो इनिङ खेल्न सक्छन् । २०२१ मा अष्ट्रेलियाले टि२० विश्वकप जित्दा वार्नर सर्वोत्कृष्ट खेलाडी चुनिएका थिए । २०१६ मा हैदराबादले वार्नरको कप्तानीमा उपाधि जित्दा तीन पटक ओरेन्ज क्याप जिती सकेका छन् ।

त्यसपछि मिचेल मार्श, पावेल, ऋषभ पन्त जस्ता म्याच विनर अलराउन्डर छन् । पन्त वर्तमान समयका विष्फोटक ब्याटर हुन् । मार्शले ब्याटिङ र तीव्र गतिको बलिङ त्यतिनै उत्कृष्ट रुपमा गर्दै आएका छन् । उत्कृष्ट लयमा रहेका पावेल मध्यक्रममा स्पिनरमाथि हाबी हुँदा ठूलो इनिङ र विष्फोटक ब्याटिङको क्षमता राख्छन् ।

तल्लोक्रममा अक्षर पटेल र शार्दुल ठाकुर जस्ता अलराउन्डर हुनेछन् । तीव्र गतिका बलर एनरिच नोर्किया, ठाकुर, कमलेश नगरकोटी, मुस्ताफिजुर रहमान, चेतन सकारिया जस्ता बलर छन् । बंगलादेशका रहमानले लगातार उत्कृष्ट प्रदर्शन गर्दै आएका छन् । सकारिया उदयीमान बलर हुन् । नोर्किया आइपिएल इतिहासकै सर्वाधिक गतीमा बलिङ गर्ने बलर हुन् । अक्षर पटेल र कुलदीप यादव स्पिनर हतियार हुन् ।

कुनैपनि टोली सफल हुन कप्तान र प्रशिक्षक पनि त्यतिनै उत्कृष्ट हुनुपर्छ । अष्ट्रेलियाका पूर्व सफल कप्तान रिकी पोन्टिङ दिल्लीका मुख्य प्रशिक्षक हुन् । पोन्टिङ वर्तमान समयका उत्कृष्ट प्रशिक्षक मानिन्छन् । उपाधिको भोक भएको दिल्ली सन्तुलन टोली र उत्कृष्ट प्रशिक्षकको सहयोगमा च्याम्पियन बन्नसक्छ ।

४. पन्जाब किंग्स

यसअघि लगातार खराब प्रदर्शन गर्दै आएको पन्जाबले अक्सनबाट मजबुत टोली निर्माण गरेको छ । पन्जाबाले अक्सनमा स्टार खेलाडी अनुबन्ध गरेको हुँदा बलियो टिम बनाएको छ । पन्जाबले अक्सनमा शिखर धवन, लियाम लिभिङस्टोन, ओडेन स्मिथ, जोनी बेयरस्टो र कासिगो रबाडा लगायतका खेलाडी किनेको थियो ।

धवन र कप्तान मयंक अग्रवालले कप्तानी ओपनिङ गर्नेछन् । जोनी बेयरस्टो, लियाम लिभिङस्टोन र शाहरुख खान जस्ता ब्याटर छन् ।लिभिङस्टोन विष्फोटक ब्याटिङका साथै लेगस्पिन र अफ स्पिन दुबै बलिङ गर्ने गर्दछन् । शाहरुख खान उत्कृष्ट फिनिसर हुन् । लिभिङस्टोन, शाहरुख खान र ओडेन स्मिथले गर्दा विष्फोटक ब्याटिङ उत्कृष्ट बनेको छ ।

राम्रो सुरुवात पाउँदा विशाल योगफलमा परिणत गर्नसक्छ । तल्लोक्रममा ओडेन स्मिथ, राज बाबा र कागिसो रबाडा हुनेछन् । वेस्टइन्डिजका युवा अलराउन्डर स्मिथ आक्रामक ब्याटिङको क्षमता राख्छन् । यू–१९ का राज बाबा पनि उपयोगी अलराउन्डर हुन सक्छन् । बाबाले यू-१९ विश्वकपमा भारतलाई उपाधि जिताउन उत्कृष्ट प्रदर्शन गरेका थिए ।

तीव्र गतिका बलर कागिसो रबाडा पन्जाबका प्रमुख हतियार हुन् । रबाडाले आइपिएलमा लगातार उत्कृष्ट प्रदर्शन गर्दै आएका छन् । योर्कर र तीव्र गतिका माहिर रबाडाले आफ्नो उत्कृष्ट बलिङमा जित सहज बनाउन सक्छन् ।

रबाडालाई अर्शदीपसिंह र ओडेन स्मिथले साथ दिनेछन् । स्पिनरमा राहुल चाहर र हरप्रीत ब्रार छन् । ब्रार पनि राम्रो ब्याटिङ गर्न सक्छन् । रबाडा, लिभिङस्टोन, धवन र बेयरस्टो जस्ता खेलाडी हुँदा पन्जाब बलियो बनेको छ ।

३. लखनऊ सुपर जायन्ट्स

लोकेश राहुलको कप्तानीमा रहेको लखनऊमा अलराउन्डर खेलाडीको बाहुल्यता छ । टि२० क्रिकेटमा अलराउन्डर निकै महत्वपूर्ण हुन्छ । विश्व स्तरिय अलराउन्डरमा लगानी गरेको लखनऊ उपाधिको दाबेदार टोली हो । ओपनरमा राहुल र क्विन्टन डी कक छन् ।

यी दुबै म्याच विनर ओपनर हुन् । भरपर्दा ब्याटरले राहुलले लगातार उत्कृष्ट प्रदर्शन गर्दै आएका छन् । त्यसपछि मनिष पाण्डे, मार्कस स्टोइनिस, जेसन होल्डर हुनेछन् । दीपक हुड्डा, क्रुनाल पान्ड्या, कृष्णपा गोथम, दुश्मन्था चामिरा जस्ता अलराउन्डर छन् ।

होल्डर, स्टोइनिस, आवेश खान र चामिरा तीव्र गतिको बलर हुन् । होल्डर र स्टोइनिस राम्रो ब्याटिङ गर्दछन् । दुश्मन्था पनि अन्त्य तिर ठूला सटको क्षमता राख्छन् । स्पिनरमा भारतीय लेगस्पिनर रवि विश्रोई, गोथम, पान्ड्या र हुडा छन् ।

२. राजस्थान रोयल्स

राजस्थान रोयल्स आइपिएल २०२० को उपाधिको प्रमुख दाबेदार टोली हो । राजस्थानको ब्याटिङ र बलिङ दुबै उत्कृष्ट छ । ओपनर यशस्वी जैसवाल, जस बटलर र देवदत्त पाडिक्कल शीर्ष तीन ब्याटर हुन् । इंग्ल्यान्डका आक्रामक ब्याटर बटलर एक्लै खेल जिताउन सक्ने खुबी भएका खेलाडी हुन् ।

जैसवाल र पाडिक्कलले लगातार उत्कृष्ट प्रदर्शन गर्दै आएका छन् । मध्यक्रममा सन्जु स्यामसन, शिम्रन हेटमायर, रास्सी भान डर डुसेन र जिमी निशम छन् । तीव्र गतिका बलरमा नवदीप सैनी, प्रसिद्ध कृष्णा, ट्रेन्ट बोल्ट, नाथन कुल्टर नाइल छन् ।

स्पिनरमा युजभेन्द्र चहल र रविचन्द्रन आश्विन जस्ता खेलाडी हुँदा राजस्थान मजबुत छ । अनुभवी र युवा खेलाडीको मिश्रण हुँदा टोली मजबुत बनेको छ । बटलर, हेटमायर र स्यामसन जस्ता विष्फोटक ब्याटर टोलीमा छन् । बोल्ट, आश्विन, चहल लगायतका बलर हुँदा राजस्थान मजबुत बनेको छ ।

१. चेन्नई सुपर किंग्स

चेन्नई अनुभवी खेलाडीको बाहुल्यता भएको हो । अन्य टोली युवा खेलाडीलाई लिएर तयार पार्न खोज्छन् । जुन आफूले भने जस्तो नहुन सक्छ । तर चेन्नई प्रदर्शन र उमेर दुबैमा परिपक्क खेलाडीमाथि बढी विश्वास र लगानी गर्छ । कुनैपनि टोली सफल हुन कप्तान पनि त्यतिनै उत्कृष्ट क्षमताको हुनुपर्छ ।

जतिनै धेरै स्टार खेलाडी भएपनि उत्कृष्ट कप्तान बिना टोली सफल हुँदैन । क्रिकेटमा मैदान बाहिर र भित्र दुबैमा कप्तानको निर्णयले ठूलो प्रभाव पार्ने गर्दछ । महेन्द्रसिंह धोनी विश्व क्रिकेटकै एक उत्कृष्ट कप्तान हुन् । धोनीको कप्तानीमा चार पटक च्याम्पियन बनेको चेन्नई इतिहासमा एक पटक मात्र लिगबाट बाहिरिएको छ ।

धोनी आफूसँग उपलब्ध खेलाडीलाईनै समेटर बलियो टोली बनाउने गर्दछ । धोनी स्टार अनुबन्ध भन्दा पनि खेलाडीलाई आफैं स्टार बनाउने गर्दछन् । त्यसैले धोनीको कप्तानीमा खेल्ने धेरै खेलाडीको सपना हुन्छ । उनको उत्कृष्ट कप्तानी सामु विपक्षी टोली निराश बन्ने गर्दछन् ।

कप्तान मात्र होईन टोली अनुभवी खेलाडीले भोरिएको छ । साविक विजेता चेन्नईमा युवा स्टार ऋतुराज गायकवाड, डेभन कन्वे, रोविन उथप्पा र अम्बाती रायुडू शीर्षक्रमका ब्याटर हुन् । न्युजिल्यान्डका स्टार ब्याटर कन्वेको आगमनमा चेन्नईको शीर्षक्रम ब्याटिङ मजबुत बनेको छ । कन्वेले अन्तर्राष्ट्रिय क्रिकेटमा लगातार उत्कृष्ट प्रदर्शन गर्दै आएका छन् ।

भारतीय ओपनरका भविष्य गायकवाडले पछिल्लो दुबै सिजनमा उत्कृष्ट प्रदर्शन गरेका थिए । गत सिजनमा ओरेन्ज क्याप विजेता खेलाडी हुन् ।मोईन अली र रविन्द्र जडेजा जस्ता स्टार अलराउन्डर टोलीमा छन् । ड्वेन ब्राभो चेन्नईमा छन् । चेन्नईको टोली सन्तुलित छ । धोनी र शिवम दुबे फिनिसरको रुपमा हुनेछन् ।

चेन्नईको ब्याटिङमा गहिराई छ । चेन्नई धोनीको उत्कृष्ट कप्तानीमा पाँचौं उपाधि जित्न सक्छ । सम्भव त धोनीको यो अन्तिम आइपिएल खेल हुनेछ । धोनी उपाधिका साथ आफ्नो खेलाडी जीवनको करिअर सकाउन खोज्नेछन् ।