एजेन्सी – एसियन क्रिकेट काउन्सिल (एसिसी) ले आयोजना एसिया कप टि२० प्रतियोगिता भदौं ११ देखि २६ गते (२७ अगष्ट देखि ११ सेप्टेम्बर) सम्म श्रीलंकामा हुने भएको छ । श्रीलंकामा शनिबार बसेको एसिसी वार्षिक साधरण सभाले उक्त निर्णय गरेको हो ।

प्रतियोगितामा एसियाका पाँच टेस्ट टोली भारत, पाकिस्तान, बंगलादेश, श्रीलंका र अफगानिस्तानसँगै छनोट हुने एक एसोसिएट टोली हुनेछन् । नेपाल भने एसिया कपको दौडबाट बाहिरी सकेको छ । युएई, सिंगापुर, कुवेत र हङकङ मध्य एक टोली एसिया कपको लागि छनोट हुनेछन् ।

नेपाल २०२० मा थाईल्यान्डमा भएको एसिसी इस्टर्न रिजनमा मलेसिया र हङकङसँग पराजित हुँदै चौथो स्थानमा रहेर बाहिरिएको थियो । एसिया कप छनोट भने अगष्ट २० देखि सुरु हुनेछ । अन्तिम पटक एसिया कप २०१८ मा भएको थियो । युएईमा सम्पन्न उक्त एसिया कपको फाइनलमा भारतले बंगलादेशलाई ३ विकेटले हराउँदै उपाधि जितेको थियो ।

यसअघि एसिया कप २०२० मा पाकिस्तानमा हुने तय थियो । तर कोरोना महामारीको कारण सरेको थियो । अव पाकिस्तानले २०२३ को एसिया कप आयोजना गर्नेछ । उक्त एसिया कप एकदिवसिय शैलीमा हुनेछ । आगमी एसिया कप १५ औं संस्करण हुनेछ ।

सन् १९८४ मा शारजाहबाट एसिया कपको सुरुवात भएको हो । साविक विजेता भारत एसिया कपको सर्वाधिक सफल टोली हो । भारतले ७ र श्रीलंकाले ५ पटक उपाधि जितेका छन् । नेपालले भने हालसम्म एसिया कप खेल्न सकेको छैन ।