काठमाडौं (हाम्रो खेलकुद) – बलिङमा उत्कृष्ट प्रदर्शन गरेपनि खराब ब्याटिङको कारण नेपालले आइसिसी विश्वकप लिग–२ मा घरेलु टोली युएईसँग लज्जास्पद हार बेहोरेको छ । मध्यम विजयी लक्ष्य पछ्याएको नेपाल शुक्रबार युएईसँग ४८ रनले पराजित हुन पुग्यो ।

१ सय ६९ रनको मध्यम लक्ष्य पछ्याएको नेपाल ३५.१ ओभरमा १ सय २० रनमा अल आउट भयो । नेपालका लागि रोहित कुमार पौडेलले ६० बलमा ४ चौकासहित सर्वाधिक ४६ रन बनाए । रोहित लगातार दोस्रो अर्धशतक प्रहार गर्न चार रनले चुकेका थिए । अन्य कुनैपनि ब्याटरले राम्रो प्रदर्शन गर्न सकेनन् ।

तीव्र गतिका बलर जुनैद सिद्दिकले पाँचौं ओभरको पहिलो बलमा कुशल भुर्तेललाई ११ रनमा बोल्ड आउट गरे । कुशलले १५ बलमा १ चौका प्रहार गरे । चौथो बलमा फ्रन्ट फुटबाट खेलेका आसिफ एज लागेर मिड अनमा ७ रनमा चिराग सुरीबाट क्याच आउट भए । आसिफले १२ बलमा १ चौका प्रहार गरे ।

नवौं ओभरको पाँचौं बलमा दीपेन्द्रसिंह ऐरी ४ रनमा रन आउट भए । ज्ञानेन्द्र मल्ल ६२ बलमा १ चौकासहित २८ रनमा रोहन मुस्तफाको बलमा एलबीडब्लू आउट भए । ज्ञानेन्द्र र रोहितले चौथो विकेटका लागि ५५ रनको साझेदारी गर्दै नेपाललाई खेलमा फर्काएका थिए । तर त्यसपछि ब्याटर चल्न नसक्दा पराजित भएको हो ।

बासिल हामिदले २४ औं ओभरको अन्तिम बलमा आरिफ शेखलाई उत्कृष्ट कट एण्ड बोल्ड गर्दै शून्यमा पेभिलिएन फर्काए । आरिफ आउट हुँदा नेपाल ८५–५ थियो । सोमपाल कामी ६ र कमलसिंह ऐरी शून्यमा आउट भए ।

युएईका पार्टटाइम स्पिनर बासिल हामिदले ५ ओभरमा १ मेडनसहित १५ रन खर्चेर ४ विकेट लिए । जुनैद सिद्दिकले ७.१ ओभरमा १ मेडनसहित १८ रन खर्चेर ३ विकेट लिए । जहुर खान र रोहन मुस्तफाले १-१ विकेट लिए ।

त्यसअघि दुबई इन्टरनेशल क्रिकेट स्टेडियममा टस जितेर पहिला ब्याटिङ थालेको युएई ४६.३ ओभरमा १ सय ६८ रनमा अल आउट भएको थियो । युएईका अनुभवी बायाँ हाते ब्याटर रोहन मुस्तफा ८१ बलमा २ चौका र १ छक्कासहित सर्वाधिक ४० रनको योगदान दिए । सिपी रिजवान ८५ बलमा ४० रन जोडे । अन्य ब्याटरले भने राम्रो प्रदर्शन गर्न सकेनन् । एक समय ३५–४ को खराब सुरुवात गरेको युएईलाई पाँचौं विकेटका लागि मुस्तफा र रिजवानले ७७ रनको महत्वपूर्ण साझेदारी गरेका थिए ।

चौथो ओभरको पाँचौं बलमा ओपनर चिराग सुरीलाई सोमपालले ६ रनमा आउट गर्दै नेपाललाई पहिलो सफलता दिलाए । सुरी आउट साइड एज लागेर विकेटकिपर आसिफ शेखबाट क्याच भए । १९ वर्षीय विकेटकिपर वृत्य अरविन्द यस खेलमा भने चल्न सकेनन् । लगातार उत्कृष्ट प्रदर्शन गर्दै आएका उनलाई सोमपालले आसिफबाट ३ रनमा क्याच आउट गराउँदै नेपाललाई प्रमुख सफलता दिलाए ।

सोमपालले १० औं ओभरको पहिलो बलमा ओपनर मोहम्मद वासिमलाई २१ रनमा कुशल भुर्तेलबाट क्याच गराउँदै प्रमुख तीन ब्याटरलाई पेभेलिएनको बाटो देखाएका थिए । वासिमले २८ बलमा ३ चौका प्रहार गरे । करण केसीले आसिफ खानलाई २ रनमा आसिफबाटनै क्याच गराएपछि युएई १०.३ ओभरमा ३५–४ को अवस्थामा पुगेको थियो ।

रिजवानलाई ४ औं ओभरको तेस्रो बलमा सन्दीपले स्टम्पिङ आउट गर्दै साझेदारी तोडे । मुस्तफालाई ३९ औं ओभरको पहिलो बलमा दीपेन्द्रले बोल्ड गरेका थिए । सागरको ४१ औं ओभरको तेस्रो बलमा ठूलो सट खेलेका बासिल हामिद लङअनमा ज्ञानेन्द्र मल्लबाट १४ रनमा क्याच आउट भए । सागरको ओडिआईमा यो पहिलो विकेट हो ।

नेपालका लागि सोमपाल कामीले ९ ओभरमा ३९ रन खर्चेर ४ विकेट लिए । करण केसीले ७.३ ओभरमा १ मेडनसहित १६ रन खर्चेर ३ विकेट लिए । सन्दीपले १० ओभरमा १ मेडनसहित ३० रन खर्चेर १ विकेट लिए । दीपेन्द्रले १० ओभरमा ४२ रन खर्चेर १ विकेट लिए । सागर ढकालले ४ ओभरमा १३ रन खर्चेर १ विकेट लिए । नेपालले पहिलो खेलमा पपुवा न्युगिनीलाई २ विकेटले हराएको थियो । सोमबार युएईसँगनै खेल्नेछ ।

अंक तालिका

ओमान २७ खेलमा १७ मा जित र ८ मा हार सहित ३६ अंक जोड्दै शीर्षस्थानमा छ । युएई १६ खेलमा ९ मा जित र ५ मा हार सहित २० अंकका साथ दोस्रो स्थानमा छ । स्कटल्यान्ड १२ खेलमा ७ मा जित र ३ मा हार सहित १६ अंकका साथ तेस्रो स्थानमा छ ।

अमेरिका १६ खेलमा ७ मा जित र ९ मा हार सहित १४ अंक भएपनि नेटरनरेटका कारण चौथो स्थानमा छ । नामिबिया १३ खेलमा ६ मा जित र ७ मा हार सहित १२ अंकका साथ पाँचौं स्थानमा छ । नेपाल १० खेलमा ५ मा जित र ५ मा हारसहित १० अंकका साथ छैटौं स्थानमा छ । पपुवा न्युगिनी १४ खेलमा १४ मानै हारका साथ पुछारमा छ ।