काठमाडौं (हाम्रो खेलकुद) – आइसिसी विश्वकप लिग–२ त्रिकोणात्मक ओडिआई सिरिजमा पपुवा न्युगिनीले प्रस्तुत गरेको मध्यम विजयी लक्ष्य पछ्याएको नेपालले खराब सुरुवात गरेको छ ।

२ सय ५ रनको विजयी लक्ष्य पछ्याएको नेपालले १५ ओभरमा ४ विकेट गुमाउँदै ४२ रन बनाएको छ । रोहित कुमार पौडेल १२ रनमा अविजित छन् ।

नेपालले ओपनर कुशल भुर्तेललाई दोस्रो ओभरको पहिलो बलमा १ रनमा गुमाएको थियो । भुर्तेललाई एलि नाओले डोगोडो बाउबाट क्याच गराए । तेस्रो ओभरको चौथो बलमा नर्मन भानुआले ज्ञानेन्द्र मल्ललाई ४ रनमा एलबीडब्लू आउट गरे । नेपालका मध्यक्रमका प्रमुख ब्याटर दीपेन्द्रसिंह ऐरीलाई राइली हेकुरेले ८ रनमा क्याच गराएपछि नेपाल २४–३ को अवस्थामा पुगेको थियो ।

असाद भालाको १५ औं ओभरको अन्तिम बलमा आसिफ शेख अघि बढेर सट खेल्नेक्रममा १६ रनमा स्टम्पिङ आउट भए । उनले ४० बलमा १ चौका प्रहार गरे ।

त्यसअघि शारजाह क्रिकेट स्टेडियममा टस जितेर पहिला ब्याटिङ रोजेको पपुवा न्युगिनीले निर्धारित ५० ओभरमा ८ विकेट गुमाउँदै २ सय ४ रन बनाएको थियो । पपुवा न्युगिनीका चाल्र्स अमिनीले ८२ बलमा ७ चौकासहित सर्वाधिक ५९ रनको योगदान दिए । चाद सोपरले ७४ बल खेल्दै २ चौकासहित ३५ रनमा सोमपाल कामीको बलमा बोल्ड भए ।

एक समय २४।४ ओभरमा ९१(४ को कमजोर अवस्थामा पुगेको पपुवा न्युगिनीलाई पाँचौं विकेटका लागि अमिनी र चाद सोपरले ७५ रनको महत्वपूर्ण साझेदरी गरेका थिए । तल्लोक्रमका नर्मन भानुवा १२ बलमा चौका र १ छक्कासहित २३ रनमा रन आउट भए ।

नेपालका लागि तीव्र गतिका बलर सोमपाल कामीले १० ओभरमा ४८ रन खर्चेर ३ विकेट लिए । स्पिनर सन्दीप लामिछाने, आरिफ शेख र ज्ञानेन्द्र मल्लले १(१ विकेट लिए ।