एजेन्सी – न्युजिल्यान्डमा जारी आइसिसी महिला एकदिवसिय विश्वकपमा इंग्ल्यान्डले भारतलाई हराउँदै पहिलो जित हात पारेको छ । सुरुवाती तीनै खेल हारेको साविक विजेता इंग्ल्यान्डले भारतलाई ४ विकेटले पराजित गर्दै पहिलो जित निकालेको हो ।

१ सय ३५ रनको सामान्य विजयी लक्ष्य पछ्याएको इंग्ल्यान्डले ३१.२ ओभरमा ६ विकेटको क्षतिमा पूरा गर्यो । इंग्ल्यान्डको जितमा कप्तान हेदर नाइटले ७२ बलमा ८ चौकासहित ५३ रनमा अविजित रहँदै जित पक्का गरिन् । नाट सेभर ४६ बलमा ८ चौकासहित ४५ रनमा आउट भइन् । सोफिया डंकले १७ र एमी जोन्स १० रनमा आउट भए । भारतीय मेघन सिंहले सर्वाधिक ३ विकेट लिइन् ।

त्यसअघि टस हारेर ब्याटिङको निम्तो पाएको भारत ३६.२ ओभरमा १ सय ३४ रनमा अल आउट भयो । भारतकी ओपनर स्मृति मन्धनाले ५८ बलमा ४ चौकासहित सर्वाधिक ३५ रन बनाइन् । हरमनप्रीत कौर १४, रिचा घोष ३३ र झुलन गोस्वामीले २० रन बनाइन् । रिचाले ५६ बलमा ५ चौकासहित सर्वाधिक ३३ रन बनाइन् । इंग्ल्यान्डकी चार्ली डिनले ८.२ ओभरमा १ मेडनसहित २३ रन खर्चेर ४ विकेट लिइन् ।

इंग्ल्यान्ड ४ खेलमा १ मा जित र ३ मा हार सहित छैटौं स्थानमा छ । इंग्ल्यान्ड यसअघि अष्ट्रेलियासँग १२ रन, वेस्टइन्डिजसँग ७ रन र दक्षिण अफ्रिकासँग ३ विकेटले पराजित भएको थियो । शीर्ष चारमा रहँदै सेमिफाइनल खेल्न इंग्लयाान्डलाई बाँकी सबै खेलमा जित निकालेर मात्र पुग्दैन । अन्य टोलीको नतिजा र नेटरनरेटमा निर्भर रहनुपर्ने हुन्छ । न्युजिल्यान्डले आइतबार न्युजिल्यान्डसँग खेल्नेछ ।

भारत ४ खेलमा २ मा जित र २ मा हार सहित तेस्रो स्थानमा छ । भारतले पाकिस्तानलाई १ सय ७ रनले हराउँदा न्युजिल्यान्डसँग ६२ रनले पराजित भएको थियो । तेस्रो खेलमा वेस्टइन्डिजलाई १ सय ५५ रनले पराजित गरेको थियो । भारतले अव शनिबार अष्ट्रेलियासँग खेल्नेछ । अष्ट्रेलिया ४ खेलमा ४ मा नै जितको साथ शीर्षस्थानमा छ ।