काठमाडौं (हाम्रो खेलकुद) – नेपाल २०२३ मा भारतमा हुने एकदिवसिय विश्वकपको रोडम्याप आइसिसी विश्वकप लिग–२ मा सबैभन्दा कम खेल्ने टोली हो । सन् २०१९ देखि सुरु भएको विश्वकप लिग–२ मा तीन वर्षको अवधिमा नेपालले ८ खेल खेलेको छ ।

कोरोना महामारीको कारण आइसिसीले विश्वकप लिग–२ को अवधि एक वर्षलाई थप्दै २०२३ सम्मलाई पुर्याएको छ । नेपालले २०२३ सम्म कुल ३६ ओडिआई खेल्नु पर्ने हुन्छ । ७ टोली सहभागी विश्वकप लिग–२ मा कुल १ सय २६ ओडिआई मध्य ६६ खेल सकिएका छन् । शीर्ष तीन टोलीले ग्लोबल छनोटमा सिधैं स्थान बनाउने छन् ।

नेपाल ८ खेलमा ४ मा जित र ४ मा हार सहित ८ अंकका साथ छैटौं स्थानमा छ । विश्वकप लिग–२ मा सर्वाधिक खेल ओमानले खेलेको छ । ओमानले ३६ मध्य २८ खेलि सकेको छ । ओमान २८ खेलमा १७ मा जित र ९ मा हार सहित ३६ अंकका साथ शीर्ष स्थानमा छ । एउटा त्रिकोणात्मक सिरिजमा तीन टोली हुन्छन् । एक सिरिजमा सबै टोलीले एक अर्कासँग दुई दुई खेल खेल्नु पर्ने हुन्छ । एउटा त्रिकोणात्मक सिरिजमा एक टोलीले कुल चार खेल खेल्छ ।

नेपालले खेलेका नेपालले ओमान र अमेरिकासँग ४–४ खेल खेलेको हो । अमेरिकासँग ४ मध्य ३ खेलमा विजयी भएको छ । ओमानसँग ४ मध्य १ खेलमा मात्र जित हात पारेको छ । नेपालले विश्वकप लिग–२ को पहिलो त्रिकोणात्मक सिरिज २०२० को फेब्रुअरीमा घरेलु मैदान टियुमा अमेरिका र ओमानसँग खेलेको थियो ।

६ महिना अघि यी दुवै टोलीसँग ओमानमा गएर खेलेको थियो । कोरोना महामारीको कारण लगातार त्रिकोणात्मक सिरिज स्थगित हुँदा नेपालले कम खेल खेलेको हो । त्यस्तै नेपाल क्रिकेट संघ (क्यान) को काम गर्ने सुस्तता शैली र आइसिसीमा बढी निर्भर हुनु कम खेल्नुको कारण हुन् ।
ओमानपछि सर्वाधिक धेरै खेल अमेरिकाले खेलेको छ । अमेरिका १६ खेलमा ७ मा जित र ९ मा हारसहित पाँचौं स्थानमा छ ।

युएई र नामिबियाले १४–१४ खेल खेलेका छन् । युएई ७ मा जित र ५ मा हार सहित तेस्रो स्थानमा छ । नामिबिया समान ७ मा जित र हार सहित चौथो स्थानमा छ । दोस्रो स्थानमा रहेको स्कटल्यान्डले १२ खेलमा ७ मा जित र ३ मा हार बेहोरेको छ । नेपालले विश्वकप लिग २ अन्तर्गत युएई र पपुवा न्युगिनीसँग खेल्ने दुबई पुगेको छ । नेपालले पहिलो खेल बुधबार पपुवा न्युगिनीसँग खेल्दै सुरुवात गर्नेछ ।

विश्वकप लिग-२ बारे स्पष्ट जानकारी

विश्वकप लिग २ आइसिसी एकदिवसिय विश्वकप २०२३ मा हुने विश्वकप छनोट यात्रा हो । नेपालसहित ओमान, स्कटल्यान्ड, नामिबिया, अमेरिका, पपुवा न्युगिनी र यूएई गरि ७ टोलीले २०२३ सम्म प्रतिस्पर्धा गर्ने छन् । होम अवे त्रिकोणात्मक सिरिज हुँदा एक टोलीले कुल ३६ ओडिआई खेल खेल्ने छन् ।

जसबाट शीर्ष तीन टोली सन् २०२३ मा भारतमा हुने एकदिवसिय विश्वकपको लागि ग्लोबल छनोटमा सोझै स्थान बनाउने छन् । पुछारका चार टोलीले प्लेअफ खेल्नुपर्ने हुन्छ । प्ले अफमा च्यालेन्ज ए र बी बाट आउने शीर्ष दुई टोली गरि ६ टोलीबीच प्रतिस्पर्धा गर्ने छन् । प्लेअफबाट दुई टोलीले ग्लोबल छनोट खेल्ने अन्तिम अवसर पाउने छन् ।

ग्लोबल छनोटमा १० टोली हुने छन् । आइसिसी विश्वकप सुपर लिगमा १२ टेस्ट टोली र नेदरल्यान्ड्स गरि कुल १३ टोली छन् । विश्वकप सुपर लिगमा १३ टोली मध्य भारत आयोजक देश हुँदा छनोट भई सकेको छ । सुपर लिग पछि अन्य शीर्ष ७ टोलीले विश्वकपमा स्थान बनाउने छन् । बाँकी पाँच टोलीले ग्लोबल छनोटमा झर्ने छन् ।

सुपर लिगका पुछारका पाँच टोली, विश्वकप लिग-२ का शीर्ष तीन टोली र प्लेअफका शीर्ष दुई टोली गरि कुल १० टोलीले ग्लोबल छनोटमा प्रतिस्पर्धा गर्ने छन् । जसबाट शीर्ष दुई टोलीले विश्वकपमा स्थान बनाउने छन् ।