काठमाडौं (हाम्रो खेलकुद) – नेपाली राष्ट्रिय क्रिकेट टोलीका अलराउन्डर दीपेन्द्रसिंह ए‍ेरीले आइसिसी प्लेयर अफ द मन्थ (महिनाको उत्कृष्ट खेलाडीको) अवार्ड जित्न सकेनन् । अघिल्लो साता महिनाको उत्कृष्ट खेलाडीको मनोनयनमा परेपनि उक्त अवार्ड भारतीय युवा ब्याटर श्रेयस ऐरले जितेका छन् ।

फेब्रुअरी महिनाको उत्कृष्ट खेलाडीको मनोनयनमा दीपेन्द्रसँगै भारतका श्रेयस ए‍ेर र यूएईका वृत्य अरविन्द थिए । दीपेन्द्र र वृत्यले आइसिसी टि२० विश्वकप छनोटमा उत्कृष्ट प्रदर्शन गरेका थिए । श्रेयसले श्रीलंका र वेस्ट इन्डिजविरुद्ध सिरिजमा उच्च प्रदर्शन गरेका थिए । दीपेन्द्रले विश्वकप छनोटमा १ सय ५९ रन र ३ विकेट लिएका थिए ।

त्यसअघि चार देश सम्मिलित सिरिजमा १ सय ४२ रन र आयरल्यान्डविरुद्ध एकै खेलमा ४ विकेट हात पारेका थिए । दीपेन्द्रले विश्वकप छनोटमा नेपाललाई सेमिफाइनलसम्म पुर्याउन उच्च अलराउन्ड प्रदर्शन गरेका थिए । यसअघि नेपालका सन्दीप लामिछानेले सेप्टेमबर २०२१ को आइसिसी प्लेयर अफ द मन्थको उपाधि जितिसकेका छन् । कुशल भुर्तेल पनि अप्रिल २०२१ मा यस अवार्डको मनोनयनमा परेका थिए ।

अवार्ड जितेका ऐरले श्रीलंकासँगको तीन टि२० आई खेलमा २८ बलमा ५७ रन, ४४ बलमा ७४ रन र ४५ बलमा ७३ रनमा अविजित रहेका थिए । ऐर तीनै खेलमा अविजित थिए । तीन खेलमा गरि २० चौका र ७ छक्का प्रहार गरेका थिए । वेस्टइन्डिजसँग तेस्रो ओडिआईमा ८० रन जोडेका थिए ।

युएईलाई दोस्रो पटक विश्वकपमा पुर्याउन अरविन्दले छनोटमा उत्कृष्ट प्रदर्शन गरेका थिए । उनले सेमिफाइनलमा नेपालविरुद्ध ४६ रनको आक्रामक इनिङ खेलेका थिए । समूह चरणमा टेस्ट टोली आयरल्यान्डलाई हराउन ९७ रनको अविजित इनिङ खेलेका थिए । जमर्नीसँग ४० र बहराइनसँग ८४ रनको उत्कृष्ट इनिङ खेलेका थिए ।

आइसिसीले हरेक महिना उत्कृष्ट प्रदर्शन खेलाडी तीन तीन खेलाडीको मनोयन सार्वजनिक गर्ने गर्दछ । यस अवार्डको विजेता आइसीसीकै प्यानल र खुला मतदानको मत अनुसार घोषणा भएको हो । आइसीसीको प्यानलमा पूर्व खेलाडी, पत्रकार तथा ब्रोडकास्टरको उपस्थिति रहने गर्दछ । आइसीसी प्यानलको मतभार ९० प्रतिशत र खुला मतदानको १० प्रतिशत भार रहने गर्दछ ।