एजेन्सी – घरेलु टोली वेस्टइन्डिजले इंग्ल्यान्डसँग पहिलो टेस्ट खेलमा मजबुत ब्याटिङ सुरुवात गरेको छ । पहिलो इनिङमा वेस्टइन्डिज ६६.५ ओभरमा २०२–४ को अवस्थामा रहँदा दोस्रो दिनको खेल सकिएको छ ।

वेस्टइन्डिज पहिलो इनिङमा १ सय ९ रनले पछि छ । क्रिजमा जेसन होल्डर १ सय ४ बलमा ६ चौका र १ छक्कासहित ४३ रनमा छन् । नक्रुमाह बोनर ३४ रनमा क्रिजमा छन् । पाँचौं विकेटका लागि ७५ रनको साझेदारी गरेका छन् ।

ओपनर तथा कप्तान क्रेग ब्रेथवेटले ७० बलमा ७ चौका र १ छक्कासहित ५५ रन बनाउँदै आउट भए । अर्का ओपनर जोन क्याम्पबेल ६३ बलमा ६ चौकासहित ३५ रनमा आउट भए । शम्राह ब्रुक्स १८ र जर्मेन ब्ल्याकवुड ११ रनमा आउट हुन पुगे । इंग्ल्यान्डका क्रिस वोक्स, क्रेग ओभरटन, मार्क वुड र बेन स्टोक्सले १–१ विकेट लिएका छन् ।

त्यसअघि सर भिभियन रिचर्ड्स स्टेडियम नर्थ साउन्डमा एन्टिगुवामा टस जितेर पहिला ब्याटिङ थालेको इंग्ल्यान्ड पहिलो इनिङमा ३ सय ११ रनमा अल आउट भएको थियो । इंग्ल्यान्डका जोनी बेयरस्टोले २ सय ५९ बलमा २१ चौकासहित सर्वाधिक १ सय ४० रनको शतकीय इनिङ खेले । बेयरस्टोले उत्कृष्ट शतकीय इनिङ खेलेपनि अन्य ब्याटरको साथ नपाउँदा इंग्ल्यान्ड विशाल योगफल बनाउन चुकेको थियो । बेयरस्टोको यो टेस्ट करिअरको आठौं शतक हो । इंग्ल्यान्डको सुरुवात भने सम्झन लायक रहेन ।

डेब्यू खेल खेलेका एलेक्स लेसलाई तीव्र गतिका बलर केमार रोचले चार रनमा एलबीडब्लू आउट गरे । जयडेन शेल्सले ज्याक क्रलीलाई आठ रनमा आउट गरे । रोचले इंग्ल्यान्डका प्रमुख ब्याटर जो रुटलाई १३ रनमा बोल्ड आउट गरेपछि समस्यामा परेको थियो । ड्यान लरेन्स २० रनमै आउट भए । इंग्ल्यान्ड एक समय १५।४ ओभरमा ४८–४ को संकट अवस्थामा पुगेको थियो ।

पाँचौं विकेटका लागि बेन स्टोक्स र बेयरस्टोले ६७ रनको साझेदारी गरे । स्टोक्स सेल्सको बलमा ९५ बलमा ४ चौकासहित ३६ रनमा बोल्ड भए । छैटौं विकेटका लागि बेन फोक्स र बेयरस्टोले ९९ रनको साझेदारी गरे । फोक्स जेसन होल्डरको बलमा ४२ रनमा एलबीडब्लू आउट भए । उनले ८७ बलमा ८ चौका प्रहार गरे ।

क्रिस वोक्स २८ रनमा आउट भए । वेस्टइन्डिजका तीव्र गतिका बलर जयडेन सेल्सले सर्वाधिक ४ विकेट लिए । केमार रोच, जेसन होल्डर र अल्जारी जोशेफले २-२ विकेट लिए ।