काठमाडौं (हाम्रो खेलकुद) – नेपालले दोस्रो अभ्यास खेलमा श्रीलंका नेभी स्र्पोटर््स क्लबविरुद्ध बलिङमा मध्यम सुरुवात गरेको छ । नेपालले प्रस्तुत गरेको १ सय ९७ रनको मध्यम विजयी लक्ष्य पछ्याएको नेभीले १० ओभरमा १ विकेट गुमाउँदै ३८ रन बनाएको छ ।

नेपालका तीव्र गतिका बलर विक्रम सोबले विकेट लिएका हुन् । त्यसअघि टस हारेर ब्याटिङ थालेको नेपाल ४३.४ ओभरमा १ सय ९६ रनमा अल आउट भएको थियो । नेपालका मध्यक्रमका दीपेन्द्रसिंह ऐरीले सर्वाधिक ६३ रन बनाए । तल्लोक्रमका ब्याटर भीम सार्कीले २८, पवन सरार्फले २२ र विवेक यादवले २६ रन बनाए । नेपालका अन्य कुनैपनि ब्याटरले राम्रो प्रदर्शन गर्न सकेनन् ।

नेपालले ओपनर ज्ञानेन्द्र मल्ल १ र कुशल भुर्तेल ३ रनमा गुमाएको थियो । त्यसपछि युवा ब्याटर रोहित कुमार पौडेल ३ र विनोद भण्डारी २ रनमा आउट भए । त्यसपछि मध्यक्रम र तल्लोक्रमका ब्याटरले इनिङ उकासेका थिए । विक्रम सोब १ र सागर ढकाल ८ रनमा आउट भए । कप्तान सन्दीप लामिछाने १४ रनमा अविजित रहे ।

पहिलो खेलमा नेपालले १ सय ११ रनको जित निकालेको थियो । युएईमा हुने आइसिसी विश्वकप लिग–२ त्रिकोणात्मक ओडिआई त्रिकोणात्मक सिरिज अघि नेपालले अभ्यासको लागि श्रीलंका भ्रमण गरेको हो । श्रीलंकामा एक हप्ताको बसाईंपछि मार्च १४ मा नेपाली टोली युएई पुग्नेछ । यसपछि टोलीले मार्च १० मा श्रीलंका पुलिस र मार्च ११ मा प्रथम श्रेणीका खेलाडी सम्मिलित कोलोम्बो ११ सँग खेल्नेछ ।