काठमाडौं (हाम्रो खेलकुद) – नेपालले पहिलो अभ्यास खेलमा श्रीलंकाको स्थानीय टोली श्रीलंका नेभी क्रिकेट टिमविरुद्ध बलिङमा राम्रो सुरुवात गरेको छ ।

नेपालले प्रस्तुत गरेको २ सय १५ रनको मध्यम विजयी लक्ष्य पछ्याएको घरेलु टोली नेभीले ५ ओभरमा २ विकेट गुमाउँदै १४ रन बनाएको छ । नेपालका तीव्र गतिका बलर करण केसी र कमलसिंह ऐरीले १-१ विकेट लिँदै राम्रो सुरुवात दिलाएका हुन् ।

त्यसअघि टस जितेर पहिला ब्याटिङ थालेको नेपाल ३७.१ ओभरमा २ सय १४ रनमा अल आउट भएको थियो । नेपालका लागि मध्यक्रमका ब्याटर दीपेन्द्रसिंह ऐरीले सर्वाधिक ४३ रन बनाए ।

युवा ओपनर आसिफ शेख ३६, कुशल भुर्तेल १३, ज्ञानेन्द्र मल्ल २ र रोहित कुमार पौडेल १३ रनमा आउट भए । तल्लोक्रमका विकेटकिपर विनोद भण्डारी २२, तीव्र गतिका बलर कमलसिंह ऐरी १५, करण केसी १६ र सन्दीप लामिछाने ११ रनमा आउट भए ।

विक्रम सोब ११ रनमा अविजित रहँदा स्पिनर सागर ढकाल १३ रनमा आउट भए । श्रीलंकाका स्पिनर अरविन्द अकुरुगोडाले ९.१ ओभरमा १ मेडनसहित ५९ रन खर्चेर सर्वाधिक ४ विकेट लिए । ए अवदतले १० ओभरमा १ मेडनसहित ३१ रन खर्चेरर ३ विकेट लिए ।

नेपालले अर्को सातापछि युनाइटेड अरव इमिरेट्स (युएई) मा हुने आइसिसी विश्वकप लिग -२ को तयारीको लागि चार अभ्यास खेल खेल्न श्रीलंका गएको हो । विश्वकप लिग-२ मा नेपालले पहिलो खेल मार्च १६ मा पपुवा न्युगिनी (पिएनजी) सँग खेल्दै सुरुवात गर्नेछ ।