काठमाडौं (हाम्रो खेलकुद) – युवा स्पिन अलराउन्डर सार्थक धितालको ह्याट्रियक सहित ६ विकेटको सहयोगमा पाँचपोखरी क्रिकेट क्लब मुलपानी मैदानमा जारी पाँचपोखरी टि२० जिल्ला स्तरिय प्रतियोगिता फाइनलमा पुगेको छ । पाँचपोखरीले पहिलो सेमिफाइनल खेलमा चौतारा साँगाचोकगढी नगरपालिकालाई ३ विकेटले हराउँदै फाइनलमा स्थान बनाएको हो ।

टस हारेर ब्याटिङ थालेको चौतारा १५.४ ओभरमा ८३ रनमा अल आउट भयो । चौतराका ओपनर नवराज थापाले सर्वाधिक २१ रन बनाए ।
पाँचपोखरीका अफ स्पिनर सार्थक धितालले ३ ओभरमा २० रन खर्चेर ६ विकेट लिए । उनले नवौं ओभरको पाँचौं, छैटौं र ११ औं ओभरको पहिलो बलमा विकेट लिँदै सार्थकले ह्याट्रिक पूरा गरेका थिए ।

सार्थक उच्च लयमा छन् । समूह ए मा पाँचपोखरीलाई अपराजित रहँदै सेमिफाइनल पुर्याउन ब्याटिङ र बलिङ दुबैमा उच्च प्रदर्शन गरेका छन् । सुरुवाती दुई खेलमा प्लेयर अफ द म्याच चुनिएका थिए । युवा तीव्र गतिका बलर निशान्त धितालले २, अनुभवी स्पिनर अजय र विजय धितालले १–१ विकेट लिए ।

८४ रनको विजयी लक्ष्य पछ्याएको पाँचपोखरीले १५.१ ओभरमा ७ विकेट गुमाउँदै पूरा गर्यो । पाँचपोखरीका महेश देउजाले ४२ बलमा ५ चौकासहित ४३ रन बनाए । अन्य ब्याटरले राम्रो प्रदर्शन गर्न सकेनन् । चौताराका नवराज थापा, निकेश श्रेष्ठ, विनोद गौतमले २-२ विकेट लिए ।
अर्को सेमिफाइनलमा पाँचपोखरी भोताङ क्रिकेट टिमले सानु सिरुवारीलाई ७० रनले हराउँदै फाइनलमा स्थान बनाएको छ ।

टस जितेर ब्याटिङ थालेको भोताङले २० ओभरमा ७ विकेट गुमाउँदै १ सय ३३ रन बनायो । उसका ओपनर पासाङ दोर्जे तामाङले ५५ बलमा ७ चौका र २ छक्कासहित सर्वाधिक ६७ रन बनाए । करण तामाङ १० र अभिनाश तामाङले १६ रन बनाए । सानु सिरुवारीका मनोज खड्का र रिञ्जिन लामाले २-२ विकेट लिए ।

सुशान चापागाईं, सुदीप दुलाल र सिर्जन दुलालले १-१ विकेट लिए । १ सय ३४ रनको विजयी लक्ष्य पछ्याएको सानु सिरुवारी १३.३ ओभरमा ६३ रनमा अल आउट भयो । उसका लागि मनोज बिक्रम १४ र रिञ्जिन लामाले १८ रन बनाए । अन्यले राम्रो प्रदर्शन गर्न सकेनन् । भोताङका पासाङ तामाङले ३, अभिनाश र करणले २-२ विकेट लिए । विक्की तामाङको नाममा १ विकेट रह्यो । फाइनल शनिबार हुनेछ । विजेताले ७५ हजार र उपविजेताले ४० हजार रुपैयाँ प्राप्त गर्नेछन् ।