काठमाडौं(हाम्रो खेलकुद) – अनुभवी खेलाडी विजय धिताल, युवा तीव्र गतिका बलर अर्यान धिताल र युवा अलराउन्डर सार्थक धितालको उच्च प्रदर्शनमा को उत्कृष्ट बलिङको सहयोगमा पाँचपोखरी क्रिकेट क्लब पाँचपोखरी टि२० जिल्ला स्तरिय प्रतियोगिता सेमिफाइनलमा पुगेको छ । योसँगै सेमिफाइनल समिकरण पनि पूरा भएको छ ।

अन्तिम खेलमा पाँचपोखरीले मेलम्ची नगरपालिकालाई एक रनले हराउँदै समूह ए बाट अपराजित रहँदै सेमिफाइनलमा स्थान पक्का गर्यो । १ सय २० रनको विजयी लक्ष्य पछ्याएको मेलम्ची १९.५ ओभरमा १ सय १८ रनमा अल आउट भयो । रोमान्चक खेलमा मेलम्चीलाई जित्न अन्तिम ओभरमा पाँच रन चाहिँएको थियो ।

तर स्पिनर विजय धितालले पाँचौं बलमा आशिष तामाङलाई एक रनमा बोल्ड गर्दै जित पक्का गराए । मेलम्चीलाई अन्तिम १२ बलमा १२ रन जितको लागि चाहिँएको थियो । हातमा चार विकेट थियो । १९ औं ओभरमा अर्यान धितालले तीन विकेटका साथ एक चौकासहित ७ रन खर्चेपछि खेल रोचक बनेको थियो ।

मेलम्चीका राम कृष्ण दुलालले २२ बलमा २ चौका र १ छक्कासहित सर्वाधिक २९ रन बनाए । १९ औं ओभरमा विजय धितालले उनको उत्कृष्ट क्याच लिँदै पाँचपोखरीको जित सहज बनाएका थिए । मेलम्चीका अन्य बालकृष्ण दुलाल १९, अनिश दुलाल १४ र हरिकृष्ण दुलाल १७ रनमा आउट भए ।

पाँच पोखरीका अर्यान धितालले ४ ओभरमा १९ रन खर्चेर ४ विकेट लिए । अर्याननै खेलको प्लेयर अफ द म्याच चुनिए । विजयले ३.५ ओभरम २२ रन खर्चेर २ विकेट लिए । अजय धितालले २ ओभरमा ९ रन खर्चेर २ विकेट लिए ।

त्यसअघि टस जितेर पहिला ब्याटिङ थालेको पाँचपोखरीले २० ओभरमा ६ विकेट गुमाउँदै १ सय १९ रन बनायो । पाँचपोखरीका ओपनर सार्थक धितालले आफ्नो लयलाई निरन्तरता दिँदै ४० बलमा ३ चौकासहित सर्वाधिक ३४ रन बनाए । विक्की श्रेष्ठ २८ बलमा ४ चौकासहित २७ रनमा आउट भए । विजयले १७ बलमा १ चौकासहित २४ रन जोडे । राजु धिताल ११ बलमा १२ रनमा आउट भए । मेलम्चीका राजु दुलाल र आशिष तामाङले २-२ विकेट लिए ।

समूह ए बाट पाँचपोखरी विजेता र सानु सिरुवारी समूह उपविजेताको रुपमा सेमिफाइनलमा पुगेका छन् । समूह बी बाट पाँचपोखरी भोताङ क्रिकेट टिम विजेता र चौतारा साँचाचोकगढी नगरपालिका समूह उपविजेता रुपमा सेमिफाइनलमा पुगेका छन् । सेमिफाइनल शुक्रबार र फाइनल शनिबार हुनेछन् ।

पहिलो सेमिफाइनलमा पाँचपोखरी र चौतारा साँगाचोकगढी तथा दोस्रो सेमिफाइनलमा सिरुवारी र भोताङ भिड्नेछन् । विजेताले ७५ हजार र उपविजेताले ४० हजार प्राप्त गर्नेछन् ।