एजेन्सी – दक्षिण अफ्रिकाले दोस्रो तथा अन्तिम टेस्ट खेलमा घरेलु टोली न्युजिल्यान्डमाथि १ सय ९८ रनको फराकिलो जित हात पारेको छ । योसँगै दुई टेस्ट खेलको सिरिज १–१ को बराबरीमा सकिएको छ ।

४ सय २६ रनको विशाल विजयी लक्ष्य पछ्याएको न्युजिल्यान्ड २ सय २७ रनमा अल आउट भयो । न्युजिल्यान्डका डेभन कन्वेले १ सय ८८ बलमा १३ चौकासहित सर्वाधिक ९२ रन बनाए । टम ब्लन्डेल ४४, डर्याल मिचेल २४ र कोलिन डि ग्रान्डहोम १८ रनमा आउट भए । दक्षिण अफ्रिका कागिसो रबाडा, मार्को ज्यानसन र केशव महाराजले ३–३ विकेट लिए ।

त्यसअघि दोस्रो इनिङमा दक्षिण अफ्रिकाले ३५४/९ को अवस्थामा इनिङ समाप्तिको घोषणा गरेको थियो । पहिलो इनिङमा ७१ रनको अग्रता लिएको दक्षिण अफ्रिकाले समग्रमा ४ सय २५ रनको अग्रता लिएको थियो । दक्षिण अफ्रिका विकेटकिपर काइल भेरेनेले १ सय ८७ बलमा १६ चौका र १ छक्कासहित १ सय ३६ रनमा अविजित रहे । कागिसो रबाडा ४७, वियान मुल्डर ३५ र रास्सी भान डर डुसेन ४५ रनमा आउट भए । न्युजिल्यान्डका टिम साउथी, म्याट हेनरी, काइल जेमिसन र निल वाग्ररले २–२ विकेट लिए ।

न्युजिल्यान्ड पहिलो इनिङमा २ सय ९३ रनमा अल आउट भएको थियो । तल्लोक्रमका ब्याटर कोलिन डि ग्राउन्डहोमले १ सय ५८ बलमा १२ चौका र ३ छक्कासहित १ सय २० रनमा अविजित रहे । डर्याल मिचेल ६०, हेनरी निकोलस ३९ र वाग्ररले २१ रन बनाए । दक्षिण अफ्रिका कागिसो रबाडाले ५ र मार्को ज्यानसनले ४ विकेट लिए ।

टस जितेर पहिला ब्याटिङ थालेको दक्षिण अफ्रिका पहिलो इनिङमा ३ सय ६४ रनमा अल आउट भएको थियो । दक्षिण अफ्रिका ओपनर सारेल एर्वीले २ सय २१ बलमा १४ चौकासहित १ सय ८ रनमा आउट भए । डिएन एल्गर ४१, एडेन माक्ररम ४२, रास्सी भान डर डुसेन ३५, मार्को ज्यानसन ३७ र केशव महाराज ३६ रनमा आउट भए । न्युजिल्यान्डको निल वाग्ररले सर्वाधिक ४ विकेट लिए । म्याट हेनरीले ३ र काइल जेमिसनले २ विकेट लिए ।

न्युजिल्यान्ड पहिलो टेस्टमा २ सय ७६ रनले विजयी भएको थियो । खेलको प्लेयर अफ द म्याच कागिसो रबाडा र प्लेयर अफ द सिरिज न्युजिल्यान्डका म्याट हेनरी भए ।