काठमाडौं (हाम्रो खेलकुद) – नेपाल एपिएफ क्लबले ललितपुर मेयर वुमन्स च्याम्पियनसिप टि२० क्रिकेट प्रतियोगिता उपाधि जितेको छ । एपिएफले सोमबार फाइनलमा सुदूरपश्चिम प्रदेशलाई ८ विकेटले हराउँदै लगातार दोस्रो पटक उपाधि जितेको हो ।

१ सय १४ रनको विजयी लक्ष्य एपिएफले १५.५ ओभरमा २ विकेट गुमाउँदै पूरा गर्यो । एपिएफको जितमा ओपनर ज्योति पाण्डेले ४४ बलमा ५ चौकासहित सर्वाधिक ४३ रन बनाइन् ।

पहिलो विकेटका लागि कप्तान सिता रानामगर र ज्योतिले ७.१ ओभरमा ५८ रनको उत्कृष्ट साझेदारीका साथ जित सहज जिततर्फ अघि बढाए । एपिएफले स्पिनर डली भट्टको छैटौं ओभरमा १९ रन जोडेको थियो । सिता स्पिनर लक्ष्मी साउदको बलमा विकेटकिपर शोभा रोकायाबाट १९ रनमा स्टम्पिङ आउट भइन् ।

सिताले २२ बलमा ३ चौका प्रहार गरिन् । इन्दु बर्मा २४ बलमा २ चौका र १ छक्कासहित २९ रनमा अविजित रहिन् । रोमा थापा ५ रनमा अविजित रहिन् । सुदूरकी लक्ष्मी साउँद र सम्झना खड्काले १–१ विकेट लिइन् ।

त्यसअघि टियु क्रिकेट मैदानमा टस जितेर पहिला ब्याटिङ थालेको सुदूरपश्चिमले निर्धारित २० ओभरमा ४ विकेट गुमाउँदै १ सय १३ रन बनाएको थियो । सुदूरकी बायाँ हाते ओपनर विन्दु रावलले ३६ बलमा ५ चौकासहित सर्वाधिक ३७ रन जोड्दै क्याच आउट भइन् । डली भट्ट २५ बलमा ४ चौका र १ छक्कासहित ३६ रनमा रन आउट भइन् ।

पहिलो विकेटको लागि ओपनर रवती धामी र विन्दु रावलले ११ ओभरमा ४८ रनको साझेदारी गरेका थिए । धामी ३१ बलमा १० रन बनाउँदै करुणा भण्डारीबाट रन आउट भइन् । मध्य गतिकी बलर सुष्मा श्रेष्ठको बलमा विन्दु एज लागेर राजमती ऐरीबाट क्याच हुन पुगिन् ।

तेस्रो विकेटका लागि डली भट्ट र कविता कुँवरले ५२ रनको साझेदारी गरेका थिए । कविता कुँवर २५ बलमा २४ रनमा अविजित रहिन् । एपिएफकी सुष्मा श्रेष्ठले ४ ओभरमा २२ रन खर्चेर २ विकेट लिइन् । अन्य बलरले विकेट लिन सकेनन् ।

एपिएफले लगातार दोस्रो पटक उपाधि जितेको हो । विजेता एपिएफले दुई लाख र उप विजेता सुदूरपश्चिमले एक लाख पाउनेछन् । गतवर्ष एपिएफले सुदूरपश्चिम प्रदेशलाई ८ विकेटले हराउँदै उपाधि जितेको थियो ।