काठमाडौं (हाम्रो खेलकुद) – नेपाल एपिएफ क्लब काठमाडौंमा जारी ललितपुर मेयस वुमन्स च्याम्पियनसिप टि२० प्रतियोगितामा अपराजित रहँदै फाइनलमा पुगेको छ । लिगको अन्तिम खेलमा एपिएफले लुम्बिनी प्रदेशलाई १० विकेटले हराउँदै अपराजितका साथ फाइनल खेल्ने भएको हो ।

सामान्य ४५ रनको विजयी लक्ष्य पछ्याएको एपिएफले ६.४ ओभरमा कुनै विकेट नगुमाई पूरा गर्यो । एपिएफकी ओपनर ज्योति पाण्डे २२ बलमा ३ चौकासहित २२ रनमा अविजित रहिन् । सिता रानामगर १८ बलमा १ चौकासहित १७ रनमा अविजित रहिन् ।

त्यसअघि टियु क्रिकेट मैदानमा टस जितेर पहिला ब्याटिङ थालेको लुम्बिनीले निर्धारित २० ओभरमा ६ विकेट गुमाउँदै ४४ रन बनायो । लुम्बिनीको नेरी थापाले १५, लक्ष्मी चौधरी ११ र सरस्वती घर्तीमगरले ८ रन बनाउनु बाहेक अन्यले राम्रो प्रदर्शन गर्न सकेनन् । एपिएफकी रेखा रावलले ४ ओभरमा ६ रन खर्चेर ३ विकेट लिइन् । सुमन विष्टको नाममा १ विकेट रह्यो ।

उपाधिको लागि एपिएफले सोमबार सुदूरपश्चिम प्रदेशसँग खेल्नेछ । एपिएफ ४ खेलमा ८ अंकका साथ शीर्ष स्थानमा रह्यो । सुदूरपश्चिम ४ खेलमा ३ मा जित र १ मा हार सहित ६ अंकका साथ दोस्रो स्थानमा रहँदै फाइनल खेलेको हो । ललितपुर महानगरपालिका आर्थिक सहयोगमा क्यानले यस प्रतियोगिता आयोजना गरेको हो । गत वर्ष एपिएफले सुदूरपश्चिमलाई फाइनलमा ८ विकेटले हराउँदै उपाधि जितेको थियो ।