मस्कट (हाम्रो खेलकुद) – नेपालले घरेलु टोली ओमानलाई हराउँदै आइसिसी टि२० विश्वकप छनोट ए मा तेस्रो बनेको छ । तेस्रो स्थानको लागि भएको खेलमा नेपालले बिहीबार ओमानलाई ९ विकेटले हराउँदै नेपाल विश्वकप छनोट अन्त्य गरेको हो ।

८८ रनको सामान्य विजयी लक्ष्य पछ्याएको नेपालले १६.२ ओभरमा १ विकेट गुमाउँदै पूरा गर्यो । नेपालको जितका ओपनर कुशल भुर्तेल ५३ बलमा ३ चौका र २ छक्कासहित ५५ रनमा अविजित रहे । कुशलले ४२ औं बलमा आफ्नो टि२० आई करिअरको पाचौं अर्धशतक पूरा गरेका थिए । उनी नेपालबाट टि२० आईमा सर्वाधिक अर्धशतक प्रहार गर्ने खेलाड बनेका छन् ।

विजयी चौका प्रहार गरेका आरिफ शेख २७ बलमा १ चौकासहित २१ रनमा अविजित रहे । ओपनर आसिफ शेख र कुशल भुर्तेलले पहिलो विकेटका लागि ७.३ ओभरमा ५० रनको साझेदारी गर्दै राम्रो सुरुवात दिलाए । आसिफ १८ बलमा १ चौकासहित १३ रनमा क्याच आउट भए ।

त्यसअघि ओमान क्रिकेट एकेडेमी ग्राउन्ड–२ मा टस जितेर पहिला ब्याटिङ थालेको ओमानले निर्धारित २० ओभरमा ९ विकेट गुमाउँदै ८७ रन बनाएको थियो। ओमानका कप्तान जिशान मकसुदले २८ बलमा ३ चौकासहित सर्वाधिक २१ रन बनाए । कलिमुल्लाह १४ र नसिम खुसी १५ रनमा आउट भए । अन्य ब्याटरले सम्झन योग्य प्रदर्शन गर्न सकेनन् ।

दोस्रो ओभरको दोस्रो बलमा ओपनर कश्याप प्रजापतिसँग तालमेल नमिल्दा जतिन्दर सिंह दुई रनमा रन आउट भए । कमलसिंह ऐरीको तेस्रो ओभरको चौथो बलमा ठूलो सट खेलेका शोएब खान तीन रनमा सन्दीप लामिछानेबाट क्याच आउट भए । अभिनाश बोहराको पाँचौं ओभरको चौथो बलमा कश्याप प्रजापति सन्दीप लामिछानेबाट पाँच रनमा आउट भए ।

सन्दीपले मोहम्मद नदिमलाई १ रनमा ज्ञानेन्द्र मल्लबाट क्याच गराए । जिशान मकसुदलाई आरिफ शेखले दीपेन्द्रबाट २१ रनमा क्याच गराउँदै ओमानलाई ११.५ ओभरमा ४२–५ को कमजोर अवस्थामा पुर्याएका थिए । तल्लोक्रमका अयान खान १६, सन्दीप गौड १ र नेस्टर धम्बा ५ रनमा आउट भए । नसिम खुसी १५ बलमा १ छक्कासहित १५ रनमा आउट भए ।

नेपालका सन्दीप लामिछानेले ४ ओभरमा १३ रन खर्चेर ३ विकेट लिए । कमलसिंह ऐरी, अभिनाश बोहरा आरिफ शेख र सागर ढकालले १–१ विकेट लिए ।

नेपाल पहिलो सेमिफाइनल खेलमा युनाइटेड अरव इमिरेट्स (युएई) सँग ६८ रनले पराजित हुँदै आगमी अक्टोबर नोभेम्बरमा हुने टि२० विश्वकपबाट बन्चित भएको थियो । नेपाल समूह बी बाट अपराजित रहँदै सेमिफाइनल खेलेको थियो । नेपालले समूह चरणमा ओमानलाई ३९ रन, फिलिपिन्सलाई १ सय ३६ रन र क्यानडालाई ८ विकेटले हराएको थियो ।

तर जित्नै पर्ने खेलमा युएईसँग पराजित भएपछि विश्वकप पुग्न सकेन । नेपालले अव मार्च तेस्रो साता आइसिसी विश्वकप लिग २ अन्तर्गत युएईमा पपुवा न्युगिनी त्रिकोणात्मक ओडिआई सिरिज खेल्नेछ । नेपालले पपुवा न्युगिनीसँग १६ मार्चमा खेल्दै सिरिजको सुरुवात गर्नेछ ।

यो पनि : नेपालले युएईमा खेल्ने विश्वकप लिग–२ को खेल तालिका सार्वजनिक