मस्कट (हाम्रो खेलकुद) – नेपालले आइसिसी टि२० विश्वकप छनोट ए मा तेस्रो स्थानको लागि जारी प्रतिस्पर्धामा ओमानविरुद्ध उत्कृष्ट सुरुवात गरेको छ ।

ओमान क्रिकेट एकेडेमी ग्राउन्ड–२ मा टस जितेर पहिला ब्याटिङ थालेको ओमानले ४.४ ओभरमा ३ विकेट गुमाउँदै १६ रन बनाएको छ । ओमानका कप्तान जिशान मकसुद ५ रनमा अविजित छन् ।

दोस्रो ओभरको दोस्रो बलमा कश्यापसँग तालमेल नमिल्दा ओपनर जतिन्दर सिंह दुई रनमा रन आउट भए । कमलसिंह ऐरीको तेस्रो ओभरको चौथो बलमा ठूलो सट खेलेका शोएब खान ३ रनमा सन्दीप लामिछानेबाट क्याच आउट भए । अभिनाश बोहराको पाँचौं ओभरको चौथो बलमा कश्याप प्रजापति सन्दीप लामिछानेबाट ५ रनमा आउट भए ।

नेपालले आजको खेलमा टोलीमा एक परिवर्तन गरेको छ । तीव्र गतिका बलर जितेन्द्र मुखियालाई बेन्चमा राख्दा युवा स्पिनर सागर ढकाललाई मौका दिएको छ । टोलीमा अन्य परिवर्तन भने भएको छैन । ओमान र नेपाल दुबै सेमिफाइनलबाट बाहिरिएका टोली हुन् ।

नेपाल पहिलो सेमिफाइनल खेलमा युनाइटेड अरव इमिरेट्स (युएई) सँग ६८ रनले पराजित हुँदै टि२० विश्वकप २०२२ मा पुग्नबाट बन्चित भएको थियो । ओमान टेस्ट टोली आयरल्यान्डसँग ५६ रनले पराजित हुँदै विश्वकप गुमाएको थियो ।