काठमाडौं(हाम्रो खेलकुद) – नेपाल एपिएफ क्लबले काठमाडौंमा जारी दोस्रो संस्करणको ललितपुर मेयर वुमन्स च्याम्पियनसिप टि२० प्रतियोगितामा लगातार दोस्रो जित हात पारेको छ । एपिएफले दोस्रो खेलमा सुदूरपश्चिमलाई ६ विकेटले हराउँदै लगातार दोस्रो जितका साथ शीर्षस्थानमा छ ।

९० रनको सामान्य विजयी लक्ष्य पछ्याएको एपिएफले १६.५ ओभरमा ४ विकेट गुमाउँदै पूरा गर्यो । एपिएफको जितमा रोमा थापा २९ बलमा ३ चौकासहित २३ रनमा अविजित रहिन् । ममता चौधरी १९ बलमा २ चौकासहित १४ रनमा अविजित रहिन् । ओपनर ज्योति पाण्डे ११, सिता रानामगर ४, इन्दु बर्मा १० र सरिता मगर ९ रनमा आउट भइन् ।

सुदूरपश्चिमकी ईश्वरी विष्टले ४ ओभरमा १३ रन खर्चेर २ विकेट लिइन् । कप्तान ऋतु कनोजियाको नाममा १ विकेट रह्यो । त्यसअघि टियु क्रिकेट मैदानमा टस जितेर पहिला ब्याटिङ थालेको सुदूरपश्चिमले निर्धारित २० ओभरमा ८९ रनमा अल आउट भयो । सुदूरपश्चिमकी कविता कुँवरले १५ बलमा १ चौका र १ छक्कासहित सर्वाधिक १८ रन बनाइन् । बिन्दु रावल र डली भट्टले ११–११ रन बनाए । ऋतु, कविता जोशी र रुबि पोद्दारले ५–५ र बनाए ।

एपिएफकी सोनु खड्काले ४ ओभरमा १४ रन खर्चेर ३ विकेट लिइन् । करुणा भण्डारीले ४ ओभरमा १ मेडनसहित १४ रन खर्चेर २ विकेट लिइन् । सिताले २ र राजमति ऐरीले १ विकेट लिए ।

एपिएफले पहिलो खेलमा प्रदेश १ लाई ६ विकेटले हराएको थियो । तेस्रो खेलमा शुक्रबार लुम्बिनी प्रदेशसँग खेल्नेछ । सुदूरपश्चिमले पहिलो खेलमा ललितपुर मेयर-११ लाई ५८ रनले हराएको थियो । तेस्रो खेलमा सुदूरपश्चिमले शुक्रबार प्रदेश १ सँग खेल्नेछ ।